Artel

Артел — фуқароларнинг бирга хўжалик фаолияти юритиш мақсадларида тузган ихтиёрий уюшмаси шаклларидан бири. Аксарият ҳолларда артел атамаси меҳнат жараёнларини бирга бажариш учун тузилган ширкатларга (балиқ овлаш, қишлоқ хўжалиги артеллари ёки ўз аъзолари меҳнатини умумлаштирмай, қисман ишлаб чиқариш воситаларига эгаликни бирлаштирувчи уюшмаларга нисбатан қўлланади. СССРда якка тартибда меҳнат фаолияти билан шуғулланувчи товар ишлаб чиқарувчилар хўжаликлари (ҳунармандлар, косиблар ва бошқалар) 20-йилларнинг бошидан ишлаб чиқариш воситаларини умумлаштириш асосида социалистик хўжалик юритиш йўлига ўтказилган ва қишлоқ хўжалиги, ҳунармандчилик, балиқчилик артеллари каби жамоа хўжаликлари тузилган эди. Уларнинг ишлаб чиқариш режалари давлат халқ хўжалиги режасига киритилар эди. 1980-йиллар охирида якка тартибда меҳнат фаолияти билан шуғулланишга доир қонунлар қабул қилингач, бундай артеллар ўз аҳамиятини йўқотди. Ҳозир балиқ овлаш, олтин излаш, касаначилик, маиший хизмат кўрсатиш соҳаларида қисман артеллар сақланиб қолган.

Адабиётлар

• ЎзМЕ. Биринчи жилд. Тошкент, 2000-йил