Atraxassis

Atraxassis-Qadimgi Shumer afsonalaridagi donishmand madaniy qahramon. Shumer hududida joylashgan Sippar shahri xarobalaridan Atraxassis haqidagi afsona yozuvlari topilgan. Unga ko‘ra, ma’buda Mami insonlarni yaratadi, ma’bud Enlil esa yerni samodan ajratib, odamlarni dehqonchilikka o‘rgatadi. Odamlar o‘zlaridan ko‘payib, yerda shovqinli hayot kechira boshlaydilar.Darg‘azab Enlil ularga vabo, qurg‘oqchilik, ocharchilik kabi balolarni yo‘llaydi.Ammo insonlar barcha ofatlarni yengib o‘tib, yashashda davom etaveradilar. Enlil ularga 7 kun va 7 tun davom etgan suv toshqinini yuboradi. Atraxassis yashagan shaharda odamlar Enlilga sig'inishardi, u esa yerostidagi dunyo okeani, chuchuk suvlar ma’budi Enkiga e’tiqod qilardi.Enki Atraxassis turli balo ofatlarni yengib o‘tish yo‘llarini o‘rgatardi.Enki unga o‘z uyini buzib, undan chizmaga ko‘ra kema yasashni buyuradi. Enki ko‘rsatmasi bilan kemaga oilasi, xizmatchilari, hayvonlari va qushlarni olib, oxirgi teshikni smola bilan yopishi bilan, osmondan barcha ma’budlar qudrati bilan yaratilgan katta to‘fon yog‘iladi. Yomg‘ir va momaqaldiroq ilohi Adad o‘z aravasida samoda sayr qilib, kuchini ko‘rsatardi. Urush ilohi Ninurta plotinadagi suvlarni chiqarsa, arslonboshli burgut Anzud ma’budi tirnoqlari bilan osmonni yora boshlaydi.Bu dahshat ilohlarning o‘zlarini ham vahimaga soldi. 7 kundan keyin to‘fon tinib, suvlar singib ketgach, Enlil yerda bironta jonzot qolmaganidan quvonadi. Ammo Enki yordamida Atraxassis va uning kemasidagilar omon qoladilar. Ular yangidan hayot boshlaydilar.Atraxassisga boqiy umr ato etiladi.

Adabiyotlar

• Najmiddinov J., Karimov J., Turdiyeva D.. Dinshunoslik. Qomusiy lugʻat. Imom Buxoriy xalqaro markazi nashriyoti, 2017 — 480-bet. ISBN 978-9943-5105-3-1.