Barquq

Барқуқ (? - 1399) - черкас мамлукларидан бўлган Миср султони. Б.нинг отаси исломни қабул қилган эди. Қримда Б.ни бир мусулмон сотиб олиб Мисрга юборган, у ерда 1364-йил амир Элбуғога сотган. Амир Б.нинг қобилиятли бола эканлигини пайқаб унга махсус тарбия берган, сўнгра амир унвонини берган. Султон Ал-Малик ал-Ашраф даврида Б. султон болаларининг тарбиячиси бўлган. У султон вафотидан сўнг тахтни зўрлик билан эгаллаб олган ва султон Ал-Малик аз-Зоҳир номини олган. Бироқ тез орада Б. зиндонга ташланган. Унинг ўрнига тахтга Ҳожи Халифа ўтирган. Лекин янги султон билан Сурия ҳокимлари ўртасида ихтилоф пайдо бўлгач, халқ яна Б.дан тахтга ўтиришни сўраган. Мана шу пайтда соҳибқирон Амир Темур Б. ҳузурига элчиларини юбориб ундан тобе бўлишни талаб қилган, бирок Б. элчиларни қатл этиб, Боязид И билан иттифоқчилик шартномаси тузган ва урушга тайёргарлик кўра бошлаган. Бироқ, Амир Темурнинг Ҳиндистонга сафари туфайли Б. билан урушишга тўғри келмади. Б. ўз ҳукмдорлигининг иккинчи ярмида Мисрда тинчлик, осойишталик ўрнатган, молия ишини яхшилаган, деҳқончилик ривожланган, илм-фан тараққий қилган.

Адабиётлар

• ЎзМЕ. Биринчи жилд. Тошкент, 2000-йил