Butil-kauchuk

Бутил-каучук - изобутилен билан оз миқдордаги (1—5%) изопренни сополимеризациялаб олинган синтетик каучук. Б. метилхлорид ёки этилхлорид эритмасида мономерларнинг катион сополимеризацияси орқали олинади. Б. оч сариқ рангли модда бўлиб, спирт, эфир, кетон, дихлоретан, анилин, нитробензолда эримайди, сув таъсирига берилмайди. У кислород, озон, нур таъсирига чидамли, секин вулканизацияланади. Б.дан ясалган резина агрессив муҳит, шу жумладан ишқорлар, водород, пероксид, денгиз суви, баъзи бир ўсимлик мойлари таъсирига чидамли. Б.нинг асосий қисми шиналар тайёрлаш учун ишлатилади. Юқори температура ва агрессив муҳитларга чидамли буюмлар ишлаб чиқаришда ҳам қўлланади.

Адабиётлар

• ЎзМЕ. Биринчи жилд. Тошкент, 2000-йил