De troubadour

„De troubadour“ („Trubadur“) — niderlandiyalik xonanda Lenny Kuhr tomonidan ijro etilgan qoʻshiq. Taronaning musiqasini David Hartsema, matnini esa Lenny Kuhrning oʻzi yozgan. Ushbu kompozitsiya Madridda boʻlib oʻtgan „Eurovision qoʻshiq tanlovi“da Niderlandiya sharafini himoya qilgan va gʻoliblikni qoʻlga kiritgan toʻrtta qoʻshiqdan biri boʻlgan. Lenny Kuhr ushbu taronani oltita tilda — niderland, ingliz, fransuz, nemis, ispan va italyan tillarida ijro etgan.

„De troubadour“
Lenny Kuhr singli
B tomon	„Mais non, Monsieur“
Chiqarilgan sanasi	1969-yil
Yozilgan sanasi	1969-yil
Davomiyligi	3:26
Leybl	Philips
Lenny Kuhr singllari xronologiyasi
„Morgen“ „De troubadour“ „Waterman“
Official performance video
"De troubadour" YouTubeda

Tarixi

Yaratilish tarixi

„De troubadour“ qoʻshigʻining musiqasini David Hartsema, matnini esa Lenny Kuhrning oʻzi yozgan. Ushbu ballada ham musiqiy jihatdan, ham mazmunan xalq qoʻshiqlari anʼanalaridan ilhomlanib yaratilgan. Qoʻshiqda oʻrta asrlar baxshisi haqida hikoya qilinadi va uning musiqasi tinglovchilarga qanday taʼsir koʻrsatishi tasvirlanadi.

Eurovision

Lenny Kuhr „Nationaal Songfestival“ sahnasida.

1969-yil 26-fevralda Lenny Kuhr ijrosidagi „De troubadour“ taronasi „Nationaal Songfestival“ tanlovining 13-mavsumida ishtirok etdi. Ushbu milliy saralash bosqichi Eurovision qoʻshiq tanlovining 14-mavsumida Niderlandiya sharafini himoya qiladigan qoʻshiq va ijrochini aniqlash maqsadida „Nederlandse Televisie Stichting“ (NTS) telekompaniyasi tomonidan tashkil etilgan edi. Qoʻshiq ushbu tanlovda gʻolib chiqdi va Eurovisionda Niderlandiya sharafini himoya qiladigan boʻldi. Lenny Kuhr ushbu taronani oltita tilda kuylagan: niderland tilida, inglizcha „The Troubadour“, fransuzcha „Le troubadour“, nemischa „Der Troubadour“, italyancha „Un cantastorie“ hamda ispancha „El trovador“ nomlari ostida ijro etgan.

1969-yil 29-martda Madridning „Teatro Real“ teatrida Eurovision qoʻshiq tanlovi boʻlib oʻtdi. „Televisión Española“ (TVE) telekompaniyasi boshchiligida tashkil etilgan ushbu musobaqa butun qitʼa boʻylab jonli efirda namoyish etildi. Tanlov kechasida Lenny Kuhr „De troubadour“ taronasini sakkizinchi raqam ostida ijro etdi. U Buyuk Britaniya vakili Lulu ijrosidagi „Boom Bang-a-Bang“ qoʻshigʻidan keyin va Shvetsiya vakili Tommy Körberg ijrosidagi „Judy, min vän“ taronasidan oldin sahnaga chiqdi. Niderlandiya vakilining jonli orkestr joʻrligidagi chiqishiga Frans de Kok dirijyorlik qildi.

Ovoz berish jarayoni yakuniga koʻra, ushbu tarona 18 ball toʻpladi. Bu Ispaniya vakili Salomé ijrosidagi „Vivo cantando“, Fransiya vakili Frida Boccara ijrosidagi „Un jour, un enfant“ hamda Buyuk Britaniya vakili Lulu ijrosidagi „Boom Bang-a-Bang“ qoʻshiqlari bilan bir xil natija edi. Oʻsha paytda gʻolibni aniqlash boʻyicha qoʻshimcha mezonlar mavjud boʻlmagani sababli, toʻrtala mamlakat ham teng huquqli gʻolib deb eʼlon qilindi. 1968-yilgi tanlovda Niderlandiya soʻnggi oʻrinni boʻlishib olgan edi. Shunday qilib, mamlakat bor-yoʻgʻi bir yil ichida (teng ballar bilan) oxirgi oʻrindan (teng ballar bilan) birinchi oʻringa koʻtarilib, noyob koʻrsatkichni qayd etdi.

Natijalar va keyingi voqealar

„De troubadour“ taronasi Kuhrning „Lenny Kuhr“ nomli studiyaviy albomiga kiritilgan. Tanlovdan besh yil oʻtgach, xonanda ushbu taronani qayta ishlangan niderlandcha matn bilan ijro etdi va unga „De generaal“ („General“) deb qayta nom berdi. Ushbu talqin Niderlandiya milliy futbol terma jamoasi murabbiyi Rinus Michelsga bagʻishlangan boʻlib, futbolchilar uni aynan shu taxallus bilan chaqirishar edi. 1981-yil 22-avgustda Mysen shahrida Eurovisionning 25 yilligiga bagʻishlab oʻtkazilgan „Songs of Europe“ yubiley shousida Kuhr oʻz taronasini qayta ijro etdi. 2021-yil 22-mayda Eurovision qoʻshiq tanlovining final bosqichida namoyish etilgan „Rock the Roof“ shousida Lenny Kuhr ham ishtirok etdi. U sahna koʻrinishida oʻzining „De troubadour“ taronasini roppa-rosa 52 yil avvalgi gʻalabali chiqishida kiygan koʻylagida ijro etdi.