Diktant

Диктант (лот. диcто — айтиб туриб ёздираман) — ўқувчиларга имло ва тиниш белгиларига доир қоидаларни ўргатишда ҳамда бу қоидалар юзасидан ҳосил қилинган малакани текширишда қўлланиладиган ёзма иш. Таълимий ва назорат турлари бор. Таълимий диктант қандай ўтказилишига қараб огоҳлантириладиган, изоҳли ва тушунтириладиган диктантларга бўлинади. Огоҳлантириладиган диктантда имло ва тиниш белгилари матн ёзишдан олдин, изоҳли диктантда матнни ёзиш жараёнида, тушунтириладиган диктантда нотаниш сўзлар матнни ўқувчилар ёзиб бўлганига қадар, имловий белгилар эса матн ёзиб бўлингач тушунтирилади. Таълимий диктантнинг танлаб олинадиган, ижодий, эркин ва ўз-ўзига диктант турлари бор. Назорат диктанти ўқувчилар билимини текширишга хизмат қилиб, катта таълимий аҳамиятга эга, чунки бунда ўқувчилар мавжуд билим ва кўникмаларини ишга соладилар. Назорат диктантда ўқувчиларнинг саводхонликлари ҳам баҳоланади.

Адабиёт

• ЎзМЕ. Биринчи жилд. Тошкент, 2000-йил