Ellington Dyuk

Эллингтон Дюк (тахаллуси, асл исми Эдуард Кеннеди) (1899.29.4, Вашингтон 1974.24.5, Ню-Ёрк) — африкаамерикалик пианиночи, композитор, жазоркестри раҳбари; мумтоз жаз санъати асосчиларидан. Бир неча академиялар фахрий аъзоси. 1916-йилдан турли жаз ансамблларида қатнашган, 1927-йилда жаз оркестрини ташкил қилиб, таркибига машҳур созандаларни жалб қилган, у билан жаҳоннинг кўпгина мамлакатларида консертлар уюштирган. Э. биринчи бўлиб жазда йирик мусиқий шакллар (оркестр учун сюиталар — "Либерия сюитаси", "Тунги одам", "Шекспир драмаларидан 12 лавҳа" ва бошқалар, "Диний мусиқа консерти"), ўзига хос оҳанг берувчи африка мусиқа чолғуларидан фойдаланган. Унинг оркестри жўрлигида буюк хонандалар куйлаган. Америка қоратанлилар фолклори, маиший жаз куй ва қўшикдаридан кенг фойдаланиб, янги ("жунгли", "кайфиятлар" ва бошқалар) услубларини кашф қилган; жаз мусиқасини консерт санъати даражасига кўтарган. Кўпгина оммалашган куйлар ("Индиго кайфияти", "Карвон", "Ёлғизлик", "Синалган хоним" ва бошқалар), шунингдек, спектакл ва кинофилмлар учун мусиқалар, балетлар, "Була" операси ва бошқаларни яратган. Жаҳон бўйлаб гастролда бўлган. Кўпгина миллий ("Гремми" ва бошқалар) мукофотлар билан тақсирланган.