Fenoksimetilpenitsillin

Феноксиметилпенициллин (Пҳенохйметҳйлпениcиллин, Пенициллин В) — табиий келиб чиқишга эга пенициллинлар гуруҳига мансуб бўлган б-лактам антибиотикидир. У ҳам бензилпенициллин каби б-лактамазалар таъсирига чидамсиз.

Фармакотерапевтик гуруҳи

Фармакологик хусусиятлари:

— препарат бактерияларнинг бўлиниш жараёнини бостириш орқали антибактериал таъсир кўрсатади, бу эса бактерияларнинг ўлимига олиб келади;

— феноксиметилпенициллин овқат ҳазм қилиш тизимида яхши ва тез сўрилади;

— қондаги препаратнинг терапевтик концентрацияси организмга киритилгандан 30 дақиқадан сўнг ҳосил бўлади ва 6-8 соат давомида сақланиб қолади;

— плацентар барердан ўта олади, она сутига кириб боради;

— Организмдан асосан сийдик билан чиқариб юборилади.

Қўллашга кўрсатмалар

У феноксиметилпенициллинга сезгир микроорганизмлар келтириб чиқарадиган юқумли касалликларни, шу жумладан сурункали бронхит, пневмония, тонзиллит ва сурункали тонзиллитнинг кучайиши каби касалликларни, ўрта отит, тери ва юмшоқ тўқималар касалликлари (рожасимон яллиғланиш, стрептодермия ва пиодермия) даволаш учун ишлатилади; юқумли касалликлар: гонорея, сифилис, қоқшол, куйдиргини даволашда ҳам ишлатилади. Бу препарат ангина ва сурункали тонзиллит, хусусан, ўткир ревматик иситма, кичик хорея, бактериал эндокардит, гломерулонефритда асоратларни олдини олиш учун асосий дорилардан биридир. Препарат дифтерия ташувчанликда, шунингдек, кичик жарроҳлик аралашувлардан сўнг (тишни олиб ташлаш, бодомсимон безни олиб ташлаш) бактериал эндокардитнинг олдини олиш учун ишлатилади.

Қўллаш мумкин бўлмаган ҳолатлар

Пенициллинларга, сефалоспоринларга, карбапенемларга юқори сезувчанликда, овқат ҳазм қилиш трактида сўрилиш бузилган ҳолатларда феноксиметилпенициллин таъқиқланади. Ошқозон-ичак трактининг оғир касалликлари қусиш ва диарея билан бирга келганда ҳам препарат қўлланилмайди.

Қўллаш бўйича эҳтиёт чоралари

Препаратни аллергик диатез ва бронхиал астма билан оғриган беморларда эҳтиёткорлик билан қўллаш керак. Ҳомиладорлик пайтида ва эмизиш пайтида феноксиметилпенициллинни қабул қилиш мумкин, аммо даволанишни бошлашдан олдин уни қўллашнинг она учун кутилаётган фойдаси ва ҳомила ёки бола учун потенциал хавфини диққат билан бахолаш керак.

Буйрак етишмовчилиги бўлса, дозани камайтириш ёки дозалар орасидаги интервални ошириш керак.

Сефалоспорин антибиотикларига (сефалексин, сефазолин, сефтриаксон, сефотаксим ва бошқалар) аллергик реаксияси бўлган беморларда феноксиметилпенициллинга ҳам ўзаро кесишувчи аллергия бўлиши мумкин.

Дори воситалари билан ўзаро таъсири

Агар сиз бошқа дори воситаларини қабул қилсангиз, албатта шифокорингизга хабар беринг.

Ичимлик содаси (натрий бикарбонат) ичакда феноксиметилпенициллиннинг сўрилишини камайтиради. Сулфадиметоксин, бисептол котримоксазол, тетрациклин, доксисиклин, левомицетин, эритромицин каби бир қатор бошқа антибактериал препаратлар билан биргаликда фойдаланиш ушбу дориларнинг самарадорлигини ўзаро камайтиради. Феноксиметилпенициллинни гормонал контрацептивлар билан бир вақтда қўллаш билан унинг самарадорлиги пасаяди. Асетилсалицил кислотаси ва индометацин феноксиметилпенициллиннинг буйраклар томонидан чиқарилишини секинлаштиради ва шу билан беморнинг танасида унинг таъсирини узайтиради.

Махсус кўрсатмалар

Феноксиметилпенициллинни узоқ муддат қўлланилганда вақти-вақти билан қоннинг назорат текширувини ўтказиш ва буйракларнинг функсионал ҳолатини баҳолаш керак.

Қўллаш усули ва дозалаш

Феноксиметилпенициллин оч қоринга, овқатдан 30-60 дақиқа олдин ёки 2 соат кейин оғиз орқали қабул қилинади. Болалар учун доза шифокор билан маслаҳатлашиб танланади.

Катталар кунига 3-4 марта 2-3 таблеткадан (0,5-0,75 г) қабул қилишади, максимал суткалик дозаси 16 таблетка (4,0 г). Даволашнинг давомийлиги камида 5-7 кун; β-гемолитик стрептококклар келтириб чиқарадиган инфексияларда — 7-10 кун.

Ревматик хуружларнинг ва/ёки кичик хореянинг такрорланишини олдини олиш учун кунига 2 марта 2 таблеткадан (0,5 г) ичилади.

Стрептококк инфексияларини олдини олиш ва кичик жарроҳлик аралашувларидан кейин эндокардитни олдини олиш мақсадида қўлланганда доза шифокор маслаҳатига кўра аниқланади.

Ножўя таъсирлари

Феноксиметилпенициллин жуда ҳавфсиз дори бўлиб, беморлар томонидан яхши ўзлаштирилади. Аммо баъзида диарея, ўртача кўнгил айниши, тил ва милкларнинг яллиғланиши, бош оғриғи, баъзи ҳолларда терида аллергия (қичишиш, тошмалар, қизариш) намоён бўлиши мумкин. Ушбу ва бошқа ножўя реаксияларнинг пайдо бўлиши билан препаратни қўллашни тўхтатинг ва дарҳол шифокор билан маслаҳатлашинг!

Яроқлилик муддати. 4 йил.

Пакетда кўрсатилган яроқлилик муддати ўтганидан кейин дори воситасидан фойдаланиш тақиқланади.

Препарат яроқсизлигининг визуал белгилари: таблеткалар рангининг ўзгариши (нормада оқ бўлади).

Сақлаш шароитлари

Қуруқ, қоронғи жойда 15 °C дан 25 гача °C ҳароратда сақланг. Болаларнинг қўли етмайдиган жойда сақланг.

Тавсия этиш қоидаси

Рецепт бўйича.

Ҳаволалар

• Дори-дармонлар учун қўшимчалар тўплами (мавжуд ҳавола)