Fuat Ablyamitov
| Фуат Якубович Аблямитов | |
|---|---|
| Таваллуди |
15-июн 1937-йил Симферопол, РСФСР, СССР |
| Вафоти |
2007-йил ноябр ойи Симферопол, Украина |
| Соҳаси | Тиббиёт |
| Иш жойлари | Тошкент тиббиёт институти |
| Илмий даражаси | Тиббиёт фанлари номзоди |
Фуат Якубович Аблямитов (1937-йил 15-июн, Симферопол, РСФСР, СССР – 2007-йил ноябр, Симферопол, Украина) – Қрим-татар жамоат арбоби, тиббиёт фанлари номзоди (1973), 2-чақириқ Қрим Республикаси Олий Кенгаши депутати.
Ҳаёти
Фуат Якубович Аблямитов 1937-йил 15-июнда Симферопол шаҳри (Қрим АССР)да туғилган. Онаси Султония фармацевт бўлиб ишлаган, отаси Ёқуб Аметович эса қишлоқ хўжалиги институтида дарс берган. 1938-йилда унинг отаси „турк, немис, инглиз ва япон разведкаси учун жосуслик қилгани учун“ қатл этилган. Таъқиблардан қочиб, она ва унинг икки ёш ўғли дастлаб 1944-йилда Туркиядаги қариндошлариникига боришга қарор қилишади. Бироқ, қариндошларини хавфга қўйишни истамай Руминияга боради. 1949-йилда Фуат, унинг укаси ва онаси „хоин“ сифатида Ўрта Осиёга сургун қилинган[1].
Фуат Якубович 1955—1957-йилларда Тошкент электротехника заводида чизмачи бўлиб ишлаган. 1960—1963-йилларда фелдшер бўлиб хизмат қилган. У 1963-йилда Тошкент тиббиёт институтини тамомлагач, тез тиббий ёрдам станциясида шифокор бўлиб ишлай бошлайди. 1973—1978-йилларда клиник шифохонанинг неврология бўлимига, 1978—1983-йилларда Тошкент тиббиёт институтида ассистент лавозимида ишлаган. Фуат Якубович 1983—1985-йилларда Москвада тез тиббий ёрдам бўлимида шифокори бўлиб ишлаган. 1985—1990-йилларда Ўзбекистон ССР Соғлиқни сақлаш вазирлиги клиникасида шифокор бўлиб ишлаган.
1987-йил 7-июлда уч қрим-татар фаоли: Фуат Аблямитов, Решат Жемилев ва Сабри Сеутова Москва ҳуқуқ ҳимоячилари томонидан ташкил этилган „Гласност“ пресс-клубининг очилишида қатнашадилар ва чет эл оммавий ахборот воситалари вакилларига июлда бўлиб ўтган намойиш ҳақида гапириб беришади[2].
1987-йилнинг ёзида Қрим татарлари зич яшайдиган шаҳар ва туманларида полицияга „тартибни тиклаш учун қўшимча ваколатлар“ берилади. Ўзбекистоннинг Тошкент, Бекобод, Сирдарё ва Янгийўл шаҳарларида КПСС аъзоси бўлган қрим-татарлар округ комитетларига чақирилиб, улардан „экстремистлар“нинг, жумладан Сабри Сеутова, Решат Жемилевнинг ҳаракатларини қораловчи баёнотларга имзо чекиш талаб қилинди.
Фуат Якубович Аблямитов 1990-йилдан 1994-йилгача Қрим Автоном Совет Социалистик Республикасининг депортация қилинган фуқароларига хизмат кўрсатиш Республика тиббиёт маркази бош шифокорининг даволаш ишлари бўйича ўринбосари лавозимида ишлаган.
1994—1998-йилларда 2-чақириқ Қрим Олий Кенгашининг депутати бўлган. У 1994—1997-йилларда соғлиқни сақлаш ва санаторий-курорт даволаш бўйича доимий комиссия аъзоси бўлган. 1997-йил февралдан 1998-йил апрелгача Қрим Автоном Республикасининг депутатлик этикаси ва ишини ташкил этиш бўйича доимий комиссиясига раислик қилган[3].
Фуат Якубович 2007-йилнинг ноябрида Симферополда узоқ давом этган касалликдан сўнг юрак хуружи ва инсултдан вафот этган.
Манбалар
- ↑ „Фуат АБЛЯМИТОВ: Сын «врага народа» в борьбе за права народа“. 2020-йил 8-июнда асл нусхадан архивланган. Қаралди: 2020-йил 8-июн.
- ↑ „Московские акции крымских татар летом 1987 года“. 2020-йил 8-июнда асл нусхадан архивланган. Қаралди: 2020-йил 8-июн.
- ↑ „Верховной Рады Автономной Республики Крым ИИ созыва (1994 – 1998)“. www.эвпcур.16мб.cом. 2023-йил 7-апрелда асл нусхадан архивланган. Қаралди: 5-ноябр 2023-йил.