Gingivit

Гингивит (лотинча: гингива — милк, итис — яллиғланиш) — милк шиллиқ қаватининг яллиғланиши. Меъда-ичак, нафас аъзолари, юрак-томир, нерв системаси, периодонтит, парадонтоз, қон касалликлари, инфексион касалликлар, авитаминозлар, оғир металлар (симоб, қўрғошин ва б.)нинг тузларидан заҳарланиш,. тиш тоши гингивитга сабаб бўлади. Баъзан антибиоцҳлар ёки бошқа дорилар қабул қилинганда ҳам гингивит юзага келади. Ҳайз сикли бузилганда, ҳомиладорлик ва балоғатга етиш даврида кўп учрайди. Чириган тиш қирраси, нотўғри қўйилган тиш ёки ясама тиш, шунингдек, дағал тиш чўткасининг милкни чақалаши, кимёвий моддалар ва иссиқдан куйиш ҳам гингивитга сабаб бўлиши мумкин. гингивитда милк қизариб шишади, безиллаб туради ва салга қонайди (катарал гингивит), милк чети кулранг караш билан қопланади, остидан яра чиқади, оғиздан сассиқ ҳид келади. Сўлак оқади, температура кўтарилади, жағ остидаги лимфа безлари катталашади (ярали гингивит); милк ўсиб, бутун тишни қоплайди, оғриқ сезилмайди (гипертрофик гингивит) ёки аксинча тиш илдизи очилиб қолади (атрофик гингивит). гингивит га хос дастлабки аломатлар пайдо бўлганда дарҳол врачга кўриниш зарур. Олдини олиш учун оғиз бўшлиғини тоза тутиш, бот-бот стоматолог врачга мурожаат қилиб, тиш тошини олдириш ва чириган тишларни даволатиб туриш лозим.

Яна қаранг

• Стоматит

Адабиётлар

• ЎзМЕ. Биринчи жилд. Тошкент, 2000-йил