Glyukuron kislota

Глюкурон кислота (глюкоза ва юн. урон — сийдик), СНО(СНОН)4 СООН — урон кислоталардан бири. Ҳайвон ва ўсимлик организмларида глюкозанинг бирламчи спирт гуруҳи оксидланишидан ҳосил бўладиган оптик фаол кристалл модда. Суюқланиш температураси 167—172°. Сувда, ишқор ва карбонатлар эритмасида яхши, бошқа кўпгина эритувчиларда ёмон эрийди. Аксари мукополисаҳаридлар, сапонинлар, ҳар хил ўсимлик елимлари ва бактериал полисаҳаридларнинг таркибига киради, ўсимликлар баргида, қанд лавлагида ва б.да учрайди. Г.к. полисаҳаридларни гидролиз қилиб, синтетик усулда эса глюкоза ҳосилаларини оксидлаб, қанд кислотанинг бирламчи лактонларини кайтариб олинади.

Адабиётлар

• ЎзМЕ. Биринчи жилд. Тошкент, 2000-йил