Gorizontal teleskop

Горизонтал телескоп — оптик ўқи горизонтал жойлашган астрономик асбоб. Қуёш бетидаги гранулалар, доглар ва ҳоказо фотосуратини олишда ишлатилади. Г. т.да селостатдан кейин ёрдамчи кўзгудан қайтган қуёш нури дастаси тасвир ясовчи оптик системага боради. Ёрдамчи кўзгудан қайтган нур телескоп дарчасидан ўтиб, параболик шаклдаги бош кўзгуга тушади. Бу кўзгу Қуёшнинг 160 мм ли тасвирини телескопнинг Нютон фокусида ҳосил қилади. Бош кўзгунинг вазиятини ўзгартириш йўли билан ундан қайтган нурни Кассегрен кўзгусига тушириб, диаметри 900 мм ли Қуёш тасвирини олиш мумкин. Қуёшнинг оқ нурдаги тасвирини фотосуратга олиш учун Г. т.нинг Нютон ва Кассегрен фокусига камера ўрнатилади. Г. т. Тошкент астрономия институтида ҳам бор.

Адабиётлар

• ЎзМЕ. Биринчи жилд. Тошкент, 2000-йил