Ziyosfera

Helena Paparizou

Helena Paparizou (Έλενα Παπαρίζου (yunon tili); 1982-yil 31-yanvarda tugʻilgan) — shved-gretsiyalik xonanda va teleboshlovchi. Shvetsiyada gretsiyalik muhojirlar oilasida tugʻilib oʻsgan. Paparizou oʻzining musiqiy faoliyatini 1999-yilda bolalikdagi doʻsti Nikos Panagiotidis bilan birgalikda Antique dueti aʼzosi sifatida boshlagan. Mazkur guruh 1999-yildan 2003-yilga qadar beshta studiyaviy albom chiqargan hamda 2001-yilgi Eurovision qoʻshiq tanlovida Gretsiya sharafini himoya qilgan.

Helena Paparizou
Paparizou 2022-yilda
Paparizou 2022-yilda
Umumiy maʼlumot
Tavalludi 1982-yil 31-yanvar (1982-01-31) (44 yosh)
Borås Shvetsiya
Janrlar
Kasbi
  • Qo‘shiqchi
  • qoʻshiq muallifi
  • teleboshlovchi
Faoliyat yillari 1999- hozirgacha
Leybllar
Fuqaroligi
  • Shvetsiya
  • Gretsiya
Turmush oʻrtogʻi
Andreas Kapsalis (turm. 2015–2025)

Antique dueti 2003-yilda tarqalib ketgach, Paparizou Sony Music ovoz yozish studiyasi bilan yakkaxon shartnoma imzolagan. Xonandaning debyut singli boʻlmish „Anapandites Kliseis“ qoʻshigʻi Protereotita (2004) albomidan oldin taqdim etilgan. Paparizouning musiqiy uslubida koʻproq laïko, pop va dens-pop musiqasi ohanglariga urgʻu berilgan. Paparizou 2005-yilda Gretsiya nomidan Eurovision qoʻshiq tanlovida „My Number One“ taronasi bilan ishtirok etib, mamlakat tarixida ilk bor ushbu tanlovda gʻalaba qozongan. Paparizou Gretsiya tashqarisida ham ingliz tilidagi materiallar bilan faoliyatini kengaytirishga harakat qilgan hamda xorijiy mamlakatlar hit-paradlariga kirishga muvaffaq boʻlgan. Uning keyinchalik chiqarilgan uchta albomi — Iparhi Logos (2006), The Game of Love (2006) va Vrisko To Logo Na Zo (2008) Gretsiya hit-paradlarida 1-oʻringa koʻtarilgan hamda platina sertifikatini qoʻlga kiritgan. Uning beshinchi studiyaviy albomi boʻlmish Giro Apo T' Oneiro (2010) ham platina sertifikatiga loyiq koʻrilgan. Paparizou Sony Music studiyasini tark etishidan oldingi soʻnggi toʻplami boʻlgan Greatest Hits & More albomini 2011-yilda taqdim etgan. U 2013-yildan buyon Minos EMI va Universal Music leybllari tarkibida faoliyat yuritib kelmoqda. 2017-yilda Paparizou oʻzining bugungi kungacha boʻlgan eng katta hiti hisoblangan, Anastasios Rammos bilan birgalikda ijro etilgan va Ouranio Toxo albomi tarkibidagi „An Me Dis Na Kleo“ taronasini taqdim etgan. Ushbu qoʻshiq YouTube platformasida 35 milliondan ortiq koʻrilgan.

Paparizou umumiy hisobda 10 ta studiyaviy albom chiqargan. Qoʻshiqchilikdan tashqari, u 2010-yillarda televideniyega qadam qoʻyib, „Dancing on Ice“ (2011) koʻrsatuvida hakam hamda „Let's Dance“ (2012) loyihasida ishtirokchi sifatida qatnashgan. 2016-yildan buyon Paparizou „The Voice of Greece“ (Gretsiya ovozi) shousida hakamlik qilib kelmoqda. U 1999-yildan boshlab oʻzining qayligʻi va menejeri Toni Mavridis bilan birga yashagan, biroq ular 2011-yilda ajrashishgan. 2015-yildan 2025-yilga qadar u qurilish muhandisi Andreas Kapsalis bilan birga hayot kechirgan.

Paparizou uch marta „Arion Music Awards“, bir marta „European Border Breakers Award“, 35 marta „MAD Video Music Awards“ va bitta „MTV Europe Music Award“ mukofotlari bilan taqdirlangan. 2010-yil 14-martda Alpha TV telekanali uni 1960-yildan buyon Gretsiyadagi eng koʻp sertifikatlangan ichki ayol ijrochilar orasida 14-oʻringa loyiq koʻrgan. Paparizou yetti marta platina va toʻrt marta oltin disk sertifikatlarini qoʻlga kiritgan. Paparizou 2000-yillarning eng muvaffaqiyatli debyut qilgan ayol xonandasi boʻlgan hamda mazkur oʻn yillikning ikkinchi yarmi uchun eng nufuzli ijrochilardan biri sifatida oʻz oʻrnini mustahkamlagan. 2010-yilda „Forbes“ jurnali Paparizouni Gretsiyadagi eng kuchli va nufuzli mashhurlar orasida 21-oʻringa joylashtirgan.

Yoshligi

Paparizou 1982-yil 31-yanvarda Shvetsiyaning Borås shahrida tugʻilgan va Gothenburg shahrining Örgryte hududida oʻsib-ulgʻaygan. U gretsiyalik muhojirlar Georgios Paparizos (1948–2008) va Efrosynë „Froso“ Paparizou oilasining kenja farzandidir[1]. Paparizouning ota-onasi Gretsiyaning gʻarbiy Fessaliya oʻlkasidagi Karditsa hududidan boʻlishgan. Uning Aretë (Rita) ismli opasi va Konstantinos (Dinos) ismli akasi bor[2][3]. Uning ota-onasi onasining tugʻilib oʻsgan shahrida tanishib turmush qurishgan va 1970-yilda Borås shahriga koʻchib oʻtishgan[2]. 1985-yilda oila Gretsiyaning Volos shahriga qarindoshlariningnikiga vaqtincha koʻchib oʻtishga majbur boʻlgan, chunki Paparizou bronxial astma kasalligiga chalingan boʻlib, uning oʻpkalari Skandinaviyaning sovuq iqlimiga dosh bera olmagan[3]. Ikki yildan soʻng, uning salomatligi yaxshilangach, oila yana Shvetsiyaning Gothenburg shahriga qaytgan[3]. Gretsiyaga boʻlgan ushbu safar tufayli Paparizou yunon tilini oʻzining ona tili sifatida bilgan va shved bolalari bilan koʻp doʻstlashmagan[4]. Boisi u yunon tilidagi maktabda tahsil olgan edi[3]. Paparizou hali ham nafas olish muammolaridan aziyat chekadi va koʻpincha sahnaga oʻzi bilan birga ingalyator olib chiqadi[4].

Paparizou ilk bor oʻn bir yoshida yunon tomoshabinlari qarshisida chiqish qilib, Christos Dantisning „Moro Mou“ qoʻshigʻini kuylagan[5]. Ikki yildan soʻng, Paparizou xonanda boʻlishga qatʼiy qaror qilgan va yunon musiqasini mukammal oʻrganishni boshlagan[4]. Oʻn toʻrt yoshida u uchta ispanzabon oʻsmir bilan birgalikda oʻzining ilk „Soul Funkomatic“ guruhini tuzgan. Ular qoʻshiq yozish uchun mablagʻ yigʻish maqsadida hip-hop yoʻnalishida chiqishlar qilishgan; guruh ikki yildan soʻng tarqalib ketgan[4]. 1998-yil 29-oktyabrda Gothenburgdagi tungi klubda sodir boʻlgan yirik yongʻinda Paparizounig 13 nafar yaqin doʻsti halok boʻlgan. Ushbu fojiada jami 63 kishi hayotdan koʻz yumib, 200 dan ortiq kishi jarohatlangan edi. U onasidan oʻsha kechaga borishga ruxsat soʻragan boʻlsa-da, onasi ruxsat bermagan edi[6]. Doʻstlarini yoʻqotgach, Paparizou qoʻshiqchilik faoliyatini butunlay tashlamoqchi boʻlgan. U Sahna sanʼati maktabiga oʻqishga kirib, u yerda teatr, aktyorlik mahorati, televideniye va rejissyorlik yoʻnalishlarida tahsil olgan[6].

Faoliyati

1999–2003: Antique davri

1999-yilda Paparizounig akasining DJ boʻlgan doʻstlari undan Notis Sfakianakisning mashhur „Opa Opa“ hiti uchun demo versiya yozib berishni soʻrashgan[6] .Biroq, qoʻshiq matni erkak kishi tilidan yozilgani sababli, Paparizou uni bolalikdagi doʻsti Nikos Panagiotidis bilan birgalikda kuylashni afzal koʻrgan[3][6][7]. Anʼanaviy yunon qoʻshiqlariga kaverlar kuylaydigan yigit va qizdan iborat duet bilan shartnoma imzolashga qiziqqan baʼzi ovoz yozish prodyuserlari Paparizou bilan bogʻlanishgan, u esa oʻz navbatida Panagiotidis nomzodini taklif qilgan[3]. Juftlik Antique guruhini tashkil etgan va mustaqil Bonnier Music leybli bilan shartnoma imzolagan[8]. Ular oʻz guruhlarini „Antique“ deb nomlashgan, chunki bu nom oʻzida „klassik“ va „boqiylik“ tuygʻusini ifodalar edi[3]. Shuningdek, bu nom Paparizounig yunon musiqasiga boʻlgan munosabati — uning uzoq, qadimiy va oʻziga xos did bilan tinglanadigan sanʼat ekanligi haqidagi tasavvurlari bilan bogʻliq boʻlgan[4]. Ularning debyut singli boʻlmish „Opa Opa“ Shvetsiya va Norvegiyada katta hitga aylanib, yakunda har ikki mamlakatda ham eng kuchli oʻntalikka kirgan[9]. Bu natija bilan „Antique“ guruhi yunon tilida kuylangan qoʻshiq bilan Shvetsiya hit-paradlarida kuchli beshlikka kira olgan ilk ijrochiga aylangan[8]. Guruhning keyinchalik chiqarilgan „Dinata Dinata“, „Follow Me“ va „Moro Mou“ singllari ham Shvetsiya hit-paradlaridan joy olgan[8].

Manbalar

  1. ↑ „el:Ο ξαφνικός θάνατος του πατέρα της Έλενας Παπαρίζου“ (el). Madata (2008-yil 29-dekabr). 2011-yil 21-iyulda asl nusxadan arxivlangan. Qaraldi: 2010-yil 13-fevral.
  2. ↑ 2,0 2,1 Elena Paparizou Number One DVD
  3. ↑ 3,0 3,1 3,2 3,3 3,4 3,5 3,6 Maravegias, Ilias „Κάνοντας μόδα τη Eurovision“ (el). Espresso News (2008-yil 17-fevral). 2011-yil 21-iyulda asl nusxadan arxivlangan. Qaraldi: 2009-yil 14-iyul.
  4. ↑ 4,0 4,1 4,2 4,3 4,4 „Έλενα Παπαρίζου“. 2016-yil 10-yanvarda asl nusxadan arxivlangan. Qaraldi: 2015-yil 25-dekabr.(Greek) Elena Paparizou’s Biography on Alpha TV's „Kafes Me Tin Elene Menegaki“. Alpha TV, 17 April 2008. Retrieved on 23 April 2008.
  5. ↑ Music Bee ANT1. Airdate: 7 October 2006
  6. ↑ 6,0 6,1 6,2 6,3 Kazoni, Sonia.. Έλενα Παπαρίζου: Baby Tiger (el). Nitro Magazine (2008-yil 1-may), s. 248.
  7. ↑ „ΒΙΟΓΡΑΦΙΚΟ Ελενα Παπαρίζου“. 2008-yil 13-yanvarda asl nusxadan arxivlangan. MAD TV. Retrieved on 2 February 2008 (Greek)
  8. ↑ 8,0 8,1 8,2 Ankeny, Jason „Elena Paparizou Biography“. AllMusic. 2024-yil 24-mayda asl nusxadan arxivlangan. Qaraldi: 2008-yil 28-oktyabr.
  9. ↑ „Antique "Opa Opa" (song) Charts“. SwedishCharts. Hung Medien (2000-yil 24-sentyabr). 2012-yil 30-sentyabrda asl nusxadan arxivlangan. Qaraldi: 2009-yil 28-oktyabr. 
"https://new.ziyosfera.uz/ziyo/Helena_Paparizou" dan olindi