Hurry Up Tomorrow (film)
Hurry Up Tomorrow — 2025-yilda suratga olingan Amerika psixologik triller filmi bo‘lib, unda Abel „The Weeknd“ Tesfaye o‘zining badiiylashtirilgan versiyasini gavdalantiradi. Film uning shu nomdagi 2025-yilgi albomiga hamroh loyiha sifatida yaratilgan. Shuningdek, unda Jenna Ortega va Barry Keoghan ham rol ijro etgan. Filmga Trey Edward Shults rejissyorlik qilgan bo‘lib, ssenariy Shults, Tesfaye va Reza Fahim tomonidan yozilgan. Film syujetidga koʻra, Tesfaye depressiya va uyqusizlik bilan kurashayotgan paytda sirli bir muxlis tomonidan ekzistensial sayohatga olib ketiladi.
| Hurry Up Tomorrow | |
|---|---|
| Fayl:Hurry Up Tomorrow - Official Film Poster.jpeg | |
| Rejissyor(lar) | Trey Edward Shults |
| Prodyuser(lar) |
|
| Ssenariy muallif(lar)i |
|
| Qaysi asarga asoslangan |
Hurry Up Tomorrow –The Weeknd |
| Rollarda |
|
| Bastakor(lar) |
|
| Operator(lar) | Chayse Irvin |
| Montajyor(lar) | Trey Edward Shults |
| Studiya |
|
| Distribyutor | Lionsgate Films |
| Premyera sanasi |
|
| Davomiylik | 105 daqiqa[1] |
| Mamlakat |
 AQSH |
| Til | inglizcha |
| Byudjet | 15 million AQSh dollari |
| Daromad | 7.8 million AQSh dollari[2][3] |
Hurry Up Tomorrow filmining ishlab chiqilishi 2022-yil sentabr oyida, psixologik zo‘riqish natijasida Tesfayening konsert vaqtida ovozini yo‘qotganidan so‘ng boshlangan. Hammualliflar Tesfaye va Reza Fahim film prodyuserlari sifatida ham faoliyat yuritgan, ularga Kevin Turen va Harrison Kreiss ham qo‘shilgan. Hurry Up Tomorrow Turen tomonidan ishlab chiqarilgan so‘nggi filmlardan biri bo‘lib, unga bag‘ishlangan. Film Kevin Turen va Tesfayening avvalgi hamkori Sam Levinson o‘rtasidagi kelishmovchilikka ham sabab bo‘lgan. Shuningdek, dastlab film distribyutorlarni jalb qila olmagani ham xabar qilingan. Asosiy suratga olish ishlari 2023-yil fevraliga kelib boshlangan va o‘sha yil iyul oyida yakunlangan.
Hurry Up Tomorrow AQShda Lionsgate tomonidan 2025-yil 16-may kuni kinoteatrlarda namoyishga chiqarilgan. Film salbiy baholarga ega bo‘lgan, keng miqyosda “vanity project” (shon-shuhrat loyihasi) sifatida tavsiflangan va kassada muvaffaqiyatsizlikka uchrab, butun dunyo bo‘ylab 7.8 million dollar daromad keltirgan. Shuningdek, film „Oltin malina“ mukofotining 46-taqdirlash marosimida beshta nominatsiyada nomzod qilib koʻrsatilgan.
Syujeti
Musiqa yulduzi Abel Tesfaye oʻz konserti oldidan tayyorgarlik ko‘radi va sahnaga chiqadi. Shundan so‘ng u o‘z menejeri Li bilan ziyofat qilib, giyohvand moddalar iste’mol qiladi. Liga qaramay, Abel yaqinda yuz bergan ajralish ortidan kuchayib borayotgan depressiya sababli sahnaga chiqishni istamaydi, chunki bu holat uni hissiy jihatdan beqaror qilib qo‘ygan edi. Shu paytda Tesfayening musiqasi muxlisi bo‘lgan Anima o‘z uyiga o‘t qo‘yadi va onasining qo‘ng‘iroqlariga e’tibor bermasdan Los-Anjelesga, Abelning navbatdagi konsertiga yo‘l oladi.
Konsert oldidan Abelga mushak tarangligi disfoniyasi tashxisi qo‘yiladi va u chiqishni bekor qilishni o‘ylaydi, biroq Li uni sahnaga chiqishga ko‘ndiradi. Sahnaga chiqishdan avval Abel sobiq sevgilisiga hissiyotlarga boy, qo‘pol so‘zlar ishlatilgan ovozli xabar qoldirib, o‘z depressiyasi uchun uni ayblaydi. Anima konsertga tashrif buyuradi; shu yerda Abel ovozini yo‘qotadi va sahnani kutilmaganda tark etadi. Anima sahna ortiga yashirincha kirib, Abel bilan uchrashadi. Qiziqish uyg‘otgan bu uchrashuvdan so‘ng Abel Animа bilan vaqt o‘tkazadi; avval Pacific Parkda, keyin esa mehmonxonada. Abel hali yakunlanmagan „Hurry Up Tomorrow“ qo‘shig‘ining bir qismini ijro etganida, undagi yolg‘izlik va tashlab ketilish mavzulari Animaga ta’sir qilib, u yig‘lab yuboradi.
Ertasi kuni Abel gastrol safariga qaytishga hozirlik ko‘rayotgan paytda, Anima onasining iztirobli qo‘ng‘irog‘iga javob beradi; onasi undan bo‘lib o‘tgan voqealarni tushuntirishni talab qiladi. Anima ko‘z yosh bilan uzr so‘rab, onasini yaxshi koʻrishini aytadi va qo‘ng‘iroqni yakunlaydi. Abel ketishga tayyorgarlik ko‘rayotganda, Anima uni o‘zini tashlab ketayotganlikda ayblab, hissiy jihatdan ochilishini iltimos qiladi, biroq u rad etadi. Shunda Anima shampan shishasi bilan uni urib, hushidan ketkazadi. Abel hushsiz holatda dahshatli tush ko‘radi: u mehmonxona xonasidan chiqib, huvillab qolgan ko‘chalarni kezadi, mehmonxona liftida yer osti tunneliga tushadi, u yerda qichqirayotgan yosh ayoldan qochadi va nihoyat qorli maydonda olov yonida o‘tirgan holda „Hurry Up Tomorrow“ qo‘shig‘ining bir qismini amxar tilida kuylayotgan o‘zining bolalikdagi timsoli bilan yuzma-yuz keladi.
Abel hushiga kelganida, mehmonxona karavotiga Anima bog‘lab qo‘ygan boʻladi; Anima uning psixologik muammolariga yuzlashishiga yordam bermoqchi ekanini va hayot tarzini o‘zgartirishini istashini aytadi. U Abelning „Blinding Lights“ va „Gasoline“ qo‘shiqlariga raqs tushib, qo‘shilib kuylaydi hamda bu treklar uning zaharli munosabatlari, giyohvandlikka qaramligi va depressiyasidan ilhomlanganini aytadi. Abel esa bu mavzuda gaplashishni rad etadi. Li Abelni topish uchun, uning telefonini kuzatib, mehmonxonaga yetib keladi. Anima uni ketishga ko‘ndirmoqchi bo‘ladi, biroq u eshikni buzib kiradi. Yuzaga kelgan to‘qnashuv davomida Anima Lini bo‘ynidan pichoqlab, o‘ldiradi. Shundan so‘ng u Abel ustiga benzin sepib, agar u rost gapirmasa, uni yoqib yuborish bilan tahdid qiladi. Abel nihoyat ochiq gapirishga qaror qilib, „Hurry Up Tomorrow“ qo‘shig‘ini kuylaydi. Anima uni karavotdan bo‘shatadi va xonani yoqib yuborib, chiqib ketadi. Abel mehmonxona xonasidan chiqib, yo‘lak bo‘ylab yuradi va bu yo‘lak uni bevosita konsert sahnasi ortiga olib boradi. U oynadagi aksiga tikilib qoladi.
Rollarda
- Abel Tesfaye — o‘zining badiiylashtirilgan versiyasi
- Ivan Troy — yosh Abel
- Jenna Ortega — Anima, The Weekndning sirli va ta’qibchi muxlisi
- Barry Keoghan — Li, Abelning menejeri
- Riley Keough —
- ovozli xabardagi qiz
- Animaning onasi (ovoz)
- Metro Boomin — o‘zining badiiylashtirilgan versiyasi
- Belly — o‘zining badiiylashtirilgan versiyasi
- Gaspard Augé — o‘zining badiiylashtirilgan versiyasi
- Xavier de Rosnay — o‘zining badiiylashtirilgan versiyasi
- Paul L. Davis — Lavi, Abel uchun ishlovchi xavfsizlik guruhi rahbari
Manbalar
- ↑ „Hurry Up Tomorrow (2025)“. Irish Film Classification Office (2025-yil 24-mart).
- ↑ „Hurry Up Tomorrow (2025)“. The Numbers.com. 2025-yil 9-avgustda asl nusxadan arxivlangan. Qaraldi: 2025-yil 12-iyul.
- ↑ „Hurry Up Tomorrow (2025)“. Box Office Mojo. Qaraldi: 2025-yil 12-iyul.