Husaynxon Orifiy

- Husaynxon Orifiy

Husaynxon Orifiy** (asli ismi: *Husaynxon Orifov*; 1947 yil 13 aprelь, Tepaqoʻrgʻon qishlogʻi, Chust tumani, Namangan viloyati) — oʻzbek adibi, yozuvchisi, dramaturg va tadqiqotchi-adabiyotshunos. 2020 yildan Oʻzbekiston Yozuvchilar uyushmasi aʼzosi. Oʻzbekiston xalq maorifi aʼlochisi (1982).

Tarjimai holi

Husaynxon Orifov 1947 yil 13 aprelda Namangan viloyati Chust tumanidagi Tepaqoʻrgʻon qishlogʻida tugʻilgan.

1953–1964 yillarda qishloqdagi 16-umumtaʼlim maktabida tahsil olgan. 1965–1971 yillarda Namangan Davlat pedagogika institutining Til va adabiyot fakulьtetini tamomlab, oʻz maktabida oʻqituvchilik faoliyatini boshlagan.

1976–1978 yillarda Toshkent davlat madaniyat institutining rejissyorlik fakulьtetida tahsil olgan.

Mehnat va ijodiy faoliyati

**1976–1988 yillar:** Chust pedagogika bilim yurtida oʻqituvchi boʻlib ishlagan. Ish faoliyati davomida drama toʻgaragi tashkil etib, bir nechta sahna asarlarini sahnalashtirgan. Shuningdek, «Gulruh» ashula va raqs ansamblida musiqa va badiiy rahbar sifatida faoliyat yuritib, ansamblь bilan respublika koʻrik-konkurslarida 1-oʻrinni qoʻlga kiritgan.
**1988–1990 yillar:** 6-sonli umumtaʼlim maktabi oʻqituvchisi.
**1990–1992 yillar:** Chust oʻlkani oʻrganish va tarix muzeyida ilmiy xodim.
**1992–1996 yillar:** 49-sonli gimnaziya maktabida direktor oʻrinbosari.

Ijodi va tadqiqotchilik merosi

Husaynxon Orifiy koʻplab badiiy, maʼrifiy va tarixiy-hujjatli asarlar muallifi, shuningdek, maʼrifatparvar shoir Muhammadsharif Sofizoda va Mavlono Chustiy merosini tadqiq etgan manbashunosdir.

1. 1. Nashr etilgan asarlari va kitoblari:

«Chustiy. Indamaslar olami» (1992, sheʼriy toʻplamni nashrga tayyorlagan)
«Mavlono Lutfulloh» (1992, Abdullohxon toʻra Maʼrufxon oʻgʻli bilan hammualliflikda manoqibni nashrga tayyorlagan)
«Toʻmor» (2001)
«Qalblardasiz, Mavlono Chustiy» (2004)
«Muhammadsharif Soʻfizoda» (2007)
«Moziydan sadolar» (2008)
«Varaqlarda qolgan sheʼriyat» (2008)
«Ayanchli qismat» (2009)
«Boʻzrukzoda» (2013)
«Maʼnaviyat sarchashmalari» (2015, hammualliflikda)
«Yonmay qolgan noyob satrlar» (2015)
«Buyuklik neʼmati» (2020)

Uning «Soʻfizoda» va «Ayanchli qismat» asarlari haqida «Imom al-Buxoriy saboqlari» respublika ilmiy-maʼrifiy jurnalining 2008 yil 1-soni hamda 2010 yil 1-sonlarida taniqli olimlarning ilmiy taqriz va fikrlari eʼlon qilingan.

Mukofot va unvonlari

«Oʻzbekiston xalq maorifi aʼlochisi» koʻkrak nishoni (1982)
«Oʻzbekiston Respublikasi mustaqilligiga 20 yil» esdalik nishoni (2011)
Oʻzbekiston Yozuvchilar uyushmasi aʼzosi (2020 yildan)