Igna

Игна, нина — 1) тикувчилик, трикотаж ишлаб чиқариш, матбаа ва бошқа мақсадларда кенг ишлатиладиган тикув қуроли. Тикувчилик игнасининг қўлда ва машинада тикадиган хиллари бор; қўлда тикадиган игна хилма-хил йўғонликдаги пўлат симдан суйри, ўткир, ип ўтказиладиган тешикли қилиб ясалади. Улар узунлиги ва диаметрига қараб рақамларга бўлинади (масалан 1 дан 9-рақамгача бўлган игнанинг йўғонлиги 0,6 дан 1,0 мм гача, узунлиги 30 дан 50 мм гача). Кийим-кечак, кўрпа-тўшак ва ҳоказо тикишда ишлатилади. Катта-кичиклиги ва йўғон-ингичкалигига қараб, чок игнаси (чок тикиш учун), қавиқ игнаси (қавиш учун), палак игнаси (палак тикиш учун), сўзан игнаси (ҳуржун, тўрва, этик, маҳси ва ҳоказо тикиш учун), машина игнаси (тикув машиналари учун) каби хилларга бўлинади. Игна юздан бир мм ларда ифодаланган рақамлар (№60 — 0,60 мм, №120 — 1,2 мм) бўйича бирбиридан фарқ қилади. Трикотаж игнаси трикотаж машинасининг изма (петля) ҳосил қилувчи қисми. Илгакли, тилли ва ўйикли хиллари кўп тарқалган;

2) тиббиётда: жарроҳлик операцияларида яраларни тикиш учун ишлатиладиган қурол; катта-кичик ва турли йўғонликдаги игналар бўлади. Шунингдек, шприц игналари ҳам бор;

3) матбаа игнаси: ёғоч дастага маҳкамланган, учи кесик конус ёки куракча кўринишидаги ингичка пўлат стержен; одатдаги тикувчилик игнасига ўхшаш бўлади. Офорт (нақш) ва гравюралар ҳосил қилишда қўлланади.