Imomat Hukmlari

Имомат ҳукмлари

а) Имомликка энг ҳақли киши қавм ичидаги Аллоҳнинг китобида энг моҳири (тажвидга уста, кўп ёд олган, қироати чиройлиси…)дир. Агар бу борада тенг бўлсалар, суннатни яхшироқ билувчилари имомлик қилади. Агар суннатни билишда ҳам тенг бўлсалар, энг аввал ҳижрат қилганлари, ҳижратда ҳам тенг бўлсалар, ёши катталари, агар шунда ҳам тенг бўлсалар, энг биринчи исломга кирганлари имомлик қилади.б) Бир киши эгалик қиладиган жойда иккинчи киши унинг рухсатисиз ҳаргиз имомлик қилмасин, масалан, меҳмон мезбоннинг уйида агар мезбон имомликка яроқли бўлса. Тик туришга қодир киши ўзидан ожиз киши орқасида туриб намоз ўқимайди. Фақатгина маҳалла имоми каби ротиб имом касаллиги туфайли ўтириб намоз ўқиса, маъмумлар ҳам ўтириб намоз ўқийдилар.

Агар имом таҳорациз ёки бирор жойига нажосат теккан ҳолида намоз ўқиб берса ва буни фақат намоз ўқиб бўлгандан кейингина билса, у ҳам унинг ортида намоз ўқиганлар ҳам намозни қайтадан ўқимайдилар. Таҳорациз ўқиган ҳолатдагина имомнинг ўзи намозини қайтадан ўқийди. Қавмнинг аксар қисми имомни ёмон кўрса, имом бундай қавмга имомлик қилиши макруҳ. Таҳоратли киши таяммум қилган имомнинг ортида туриб намоз ўқиши жоиздир.