Irving Langmuir

Ирвинг Лангмуир (1881.31.1, Бруклин, Ню-Ёрк штати — 1957.16.8, Фалмут, Массачусец штати) — америкалик физик ва кимёгар. Илмий ишлари газлардаги электр разрядлар, термоэлектрон эмиссия, вакуум техникаси ва бошқаларга оид. Эмиссион ток зичлигини ифодалайдиган формулани таклиф этган (1913). Металл сиртлар билан туташувчи газ ва буғларнинг термик ионланишини текширган (1924). Атомар водородни ҳосил қилган (1911) ва унинг алангасида металларни пайвандлаш жараёнини ишлаб чиққан. Биринчи конденсацион буғ симобли вакуум насосни ясаган (1916). Қаттиқ сиртларда газлар адсорбсияскни ўрганиб, адсорбсия чегараси мавжудлигини аниқлаган ва адсорбсия изотермаси тенгламасини таклиф қилган (1909—16). Л. мономолекуляр адсорбсион қатламлар тузилишини текширган, коллоид системаларнинг назарий масалаларини ишлаб чиққан. Нобел мукофоти лауреати (1932).