Issiqlik nasosi

Иссиқлик насоси — иссиқлик энергетика қурилмаси. Вазифаси — паст трали иссиқлик бергич (мас, сув) иссиклик энергиясини юқори трали иссиқлик қабул қилгичга узатиш. Иссиқлик насосининг ишлаши учун ташқи энергия (механик, электр, кимёвий) сарф бўлиши керак. Иссиқлик насосида содир бўладиган жараёнлар совитиш машинасида иш жисми амалга ошириладиган жараёнларга ўхшаш; лекин совитиш машинасида совуқ, иссиқлик насосида иссиқлик билан иш кўрилади. Иссиқлик насоси, асосан, юқори босимли конденсатор, паст босимли буғлаткич, компрессор ва дросселли вентилдан иборат. Расмда иситиш учун мўлжалланган иссиқлик насоси схемаси берилган. Паст температурада қайновчи суюқлик (хлорометил, фреон, аммиак) температураси унча юқори бўлмаган сув ҳавзаси иссиқлиги ҳисобига буғланади. Ажралган буғ компрессорда сиқилади ва иситиш тизимидаги иссиқлик элтувчи (ишлатилган сув) совитиладиган юқори босимли конденсаторда конденсатланади. Суюқлик дросселли вентилдан ўтиб, босими пасаяди ва буғлаткичга киради. Сикллар шу тарзда такрорланаверади. Иссиқлик қабул қилгич ажраткичдан ўтган иссиқликдан ташқари сарфланган энергияга тенг иссиқликни ҳам олгани учун Иссиқлик насоси электр, механик ёки кимёвий энергияни бевосита иссиқликка айлантирадиган қурилмаларга нисбатан анча самарали ҳисобланади. Иссиқлик насоси биноларни иситишда ва технология жараёнларида қўлланади.