Javzo masjidi
Javzo masjidi — Qirg‘izistondagi O’sh shahriga yaqin, Sulaymon tog‘i etagida joylashgan masjid bo‘lgan. Zahiruddin Muhammad Bobur masjidni o‘z asarida shunday tavsiflaydi:
„Baroko’h tog’i (Sulaymon tog’ning qadimiy nomi) domanasida shahr bila tog’ning orasida bir masjid tushubtur, masjidi Javzo otliq“[1].
Annette Susannah Beverij xonim, Boburnoma asarini ingliz tiliga tarjima qilar ekan, „Javzo“ so‘zining ma’nosini „egizak“ deb izohlaydi[2].
Amerikalik diplomat, yozuvchi va sayyoh Eugene Schuyler o‘zining „Turkiston: Rus istilosidagi Turkistondan esdaliklar“ asarida Barako‘h (Sulaymon) tog‘i etagida ikki yoki uchta masjid mavjudligini qayd etadi[3]. Shu masjidlardan biri Javzo masjidi bo’lishi mumkin.
Mashhur fransuz tarixchisi va yozuvchisi Marie de Ujfalvy-Bourdon ham „Parijdan Samarqand, Farg’ona, G’ulja, va g’arbiy Sibirgacha: Parijlik ayolning sayohat taassurotlari“ nomli asarida Sulaymon tog‘i etagida masjid borligini yozadi[4]. Annette Susannah Beverij ushbu masjid Zahiruddin Muhammad Bobur zikr qilgan Javzo masjidi bo‘lishi mumkinligini ta’kidlaydi[5].
Manbalar
- ↑ Boburnoma, „yangi asr avlodi“ nashriyoti, 2015, 9-bet.
- ↑ The Baburnama in English (Boburnoma ingliz tilida), Annette Susannah Beverij, London, 1922, 6-bet.
- ↑ Turkistan: notes of a journey in Russian Turkistan, Nyu-York, 1877, 2-jild, 45-bet..
- ↑ De Paris a Samarkand (Parijdan Samarqandgacha), Parij, 1880, 330-331 betlar..
- ↑ The Baburnama in English (Boburnoma ingliz tilida), Annette Susannah Beverij, London, 1922, 6-bet..