Kenema

Кенема — Серра-Леонедаги шаҳар, мамлакатнинг жануби-шарқида. Шарқий провинсиянинг маъмурий маркази. Аҳолиси 300 минг кишидан зиёд (1990-йиллар бошлари). Автомобил йўллари тугуни. Хунармандчилик ривожланган. Мамлакатда йирик корхона — ёғочсозлик комбинати ("Форест индастрис" давлат компанияси) мавжуд бўлиб, мебел, ёғоч плиталар ва б. ишлаб чиқарилади. Озиқ-овқат саноати (шоли оқлаш, кофе, гўштни қайта ишлаш ва ҳоказо) корхоналари, автомобил таъмирлаш устахоналари, олмосга ишлов бериш корхоналари, иссиклик электр ст-яси, техника институти бор. Қ. х. маҳсулотлари билан савдо қилинадиган марказ. К. яқинида хромит конлари топилган.