Kineskop

Кинескоп (юн. кинесис — ҳаракат ва сропео — қарайман) — қабул қилувчи телевизион трубка — электр сигналларни ёруғлик сигналларига айлантирувчи қурилма; телевизион тасвирларни қайта кўрсатувчи электрон нурли трубка. Оққора тасвир ҳосил қилинадиган К. электрон прожекторли шиша колбадан иборат бўлиб, унинг олд девори (экрани) оқ ёруғлик берадиган люминофор қатлами билан қопланган. Электрон оқими (электрон нур) таъсирида люминофор ёриша бошлайди, магнит тизим билан оғдириладиган электрон нур эса тасвирни ёйиб, экранда телевизион тасвир ҳосил қилинади. Тасвирнинг ёруғлигини ва контрастлигини ошириш, шунингдек, люминофорнинг манфий ионлар оқимидан емирилмаслиги учун колбанинг ички сиртига юпқа (0,5—1,0 мкм) алюминий парда қопланади. Рангли тасвир ҳосил қилинадиган К.да учта электрон прожектор бор, экрани эса қизил, яшил ва кўк ёруғлик берадиган люминофор билан қопланган (қаранг Рангли телевидение). Катта (3—4 м2) экранда телевизион тасвир ҳосил қилиш учун равшанлиги юқори бўлган проексион К.дан фойдаланилади. Ок,-қора тасвирли К.нинг экрани диагонали бўйича 3, 6, 11, 16, 23 мм (кўтариб юриладиган), 35, 43, 47, 59, 61, 65 ва 67 мм ўлчамда; рангли тасвирли К. 25, 40, 59 ва 61 мм ва ҳоказо ўлчам қилиб ишлаб чиқарилади.