Kontraktura

Kontraktura (lotincha contractura — tortish, tortishish), changak — boʻgʻim harakatining vaqtincha yoki butunlay cheklanishi. Boʻgʻimning yozilmay yoki bukilmay qolishi kontrakturaning asosiy koʻrinishlaridandir. Boshqa harakatlar (aylanma va yon tomonga — oʻngga yoki chapga) ham cheklanishlar kuzatiladi. Kontraktura odatda maʼlum ishni uzoq vaqt bajarib turganda sodir boʻladi va bu yengil shakli boʻlib, tezda oʻtib ketadi. Lekin tugʻma shakllari ham boʻlishi mumkin, bu rivojlanish nuqsonlari bilan bogʻliq boʻlib, tuzalmaydi va muayyan aʼzo shakli oʻzgarganicha qoladi. Masalan, maymoq oyoqlilik. Orttirilgan kontraktura koʻpincha boʻgʻimning shikastlanishi yoki kasalligi, kuyishdan hosil boʻlgan chandiqlarning tortishishi, muskullarning shikastlanishi natijasida yuzaga keladi. Bosh miya shikastlanishi (insult) da ham kontraktura sodir boʻladi, bunda muskullarni harakatga keltiruvchi nervlar falajlanadi (akashak holati kabi).