Кварс лампаси — электр ёрдамида ултрабинафша нурлар ҳосил қиладиган ёруғлик манбаи. К.л.нинг баллони кварс шишаси (суюлтирилган кварс) дан ясалади. Баллон трубкасининг охирига контактлар ўрнатилиб, баллонга симоб буғлари ва инерт газ — аргон тўлдирилади. Аргондан электр разряди ўтганда симоб буғлари ултрабинафша нурлар чиқаради. Бу нурлар баъзи касалликлар (мас, рахит) ни даволашда, инкубаторларда, ўсимликлар ўстиришда, шунингдек, операция залларидаги ҳавони тозалашда, сув ва сутни зарарсизлантиришда ҳамда люминессент анализда ишлатилади. Паст, юқори, ўта юқори босимли К. л. бўлади.[1]

Манбалар

  1. ↑ ЎзМЕ. Биринчи жилд. Тошкент, 2000-йил