Masjidi Rashid

Masjidi Rashid
	Masjid
	Masjidi Rashid

Masjidi Rashid, shuningdek, Jome Rashid masjidi, Masjidi Roshidiya, Toj masjid nomlari bilan tanilgan, baʼzan Masjid Jome Rashid tarzida ham yoziladi. Hindistonning Uttar-Pradesh shtati Saharanpur tumani Deoband shahri Dorul Ulum Deoband majmuasi hududida joylashgan sunniy jome masjid. Ushbu masjid Dorul Ulum Deoband majmuasining ikkinchi homiysi Rashid Ahmad Gangohiy sharafiga nomlangan.

Umumiy maʼlumot

Masjid ar-Rashid oʻziga xos meʼmoriy qiyofasi, koʻrkam gumbazi va salobatli minoralari bilan ajralib turadi. Inshoot musulmonlar va boshqa sayyohlar uchun muhim ziyorat maskaniga aylangan. Masjidga ilk nazar tashlaganda, bino goʻyo islom dini bu hududga kirib kelgan davrda qurilgandek taassurot uygʻotadi. Keng hovli, markaziy darvozaning ikki tomonida joylashgan uzun ayvonlar hamda tashqi qismidagi keng maydon masjidning jozibasini yanada oshiradi^[1]. Masjidda ishlatilgan oq tosh plitalar oy yorugʻida Toj Mahal manzarasini eslatadi. Bu esa tashrif buyuruvchilarni shu yerda bir muddat oʻtirib, atrofni tomosha qilishga undaydi. Masjid tashqarisidagi kichik va ozoda hovuz hamda did bilan barpo etilgan gulzor unga alohida goʻzallik bagʻishlaydi. Masjidni tomosha qilish uchun doim bu yerga koʻplab odamlar tashrif buyuradi^[1].

Darul Ulum maʼmuriyati ushbu masjidni qurishga qaror qilganida uning bunchalik goʻzal va mahobatli boʻlib chiqishini tasavvur ham qilmagan edi. Qurilish ishlari boshlanishi bilanoq mahalliy aholi kutilganidan ancha koʻp mablagʻ ehson qila boshladi. Natijada dastlabki sodda loyiha oʻzgartirildi. Hozirgi masjid binosini qurib bitkazish uchun 20 yil va katta miqdorda^{[oydinlashtirilsin]} mablagʻ sarflandi. Masjidning balandligi 37 metr boʻlgan gumbaz, har biri 55 metrli ikkita minora va beshta eshigi bor. Bir vaqtning oʻzida bu yerda 20 000 nafar namozxon ibodat qilishi mumkin^[1].

Jamiyat Ulamoi Hind tashkilotining marhum rahbari Asad Madaniy hayotining soʻnggi yillarigacha har Ramazon oyida yuzlab shogirdlari bilan birga masjidda eʼtikof oʻtirgan. Uning oʻgʻli Mahmud Madaniy ham bu anʼanani davom ettirib kelmoqda^[1].