Молия тизими — иқтисодиёт пул секторининг бир қисми, молия амалиёти. Молия тизими фақат молия муносабатларини эмас, балки молияга тааллуқли сиёсий, ташкилий муносабатларни ҳам қамраб олади. Бу тизим таркибига қуйидагилар киради: а) молия обектини ҳосил этувчи пул фондлари ёки молия ресурслари; б) корхоналар, хонадонлар, давлат идоралари ва нодавлат ташкилотларидан иборат молия муносабатларининг субектлари — иштирокчилари; в) молия механизми, яъни молия муносабатларида қўлланиладиган ва пул билан боғлиқ воситалар (фойда, зарар, рентабеллик, ликвидлик, бюджет, бюджетдан ташқари фондлар, субсидия, субвенсия, дотация, санация, молия нормативлари, молиявий санксия ва бошқалар); г) молия институтлари ва давлатнинг молия идоралари (молия компаниялари, молия жамғармалари, молия вазирлиги, унинг маҳаллий бўлинмалари, солиқ идоралари, ғазначилик хизмати, солиқ полицияси ва бошқалар); д) молия бозори — фонд бозори, суғурта хизмати бозори, валюта бозори; э) молия сиёсати — иқтисодиёт субектларининг молияга оид йўл-йўриқлари ва хатти-ҳаракати.

Молия тизими иқтисодий тизимнинг муҳим унсури, унинг ёрдамида иқтисодиёт тартибланади, иқтисодий ўсиш рағбатлантирилади[1].

Манбалар

  1. ↑ ЎзМЕ. Биринчи жилд. Тошкент, 2000-йил