Mugʻon

Муғон, Муқон (?—572) — Турк хоқонлиги хоқонларидан бири. Бумин хоқоннинг ўғли.

Асли исми Қушу бўлиб, М. унвони билан тахтга ўтирган. М.нинг бир неча исмлари бўлган — Қуш, Егин — невара, жиян; Янди — ғолиб; унвони — М.; М. қаҳрли, жасур, ақлли бўлиб, уни жангу жадалдан бошқа ҳеч нарса қизиқтирмаган. 553 йил кузида у жужанларни қайта тормор этган. Жужанлар Си императоридан бошпана топганлар. 555 йил Си императори ўз еридан жужанларни ҳайдаб чиқарган, чунки улар қароқчилик қилишга ўтгандилар. Бундан фойдаланган М. ва киданлар жужанларни тормор килганлар. 554 йил М. давлати кичик бир мулкдан империяга айланган. Шимолида Сигу давлати ҳам забт этилган. Чжоу империяси билан тузилган шартномага кўра, Чжоу М.га ҳар йили 100 минг парча ипак мато солиғи тўлаб турган. 572 йил М. вафот этган. Тахтга ўтирган укаси Таспар хоқон Си империяси билан сулҳ тузган. Чжоу солиқлан бош тортганда унга ҳужум қилган ва Чжоу яна солиқ тўлашга мажбур бўлган.