Nikotin kislotasi

Никотин кислотаси, пиридин 3-карбон кислота — сувда оз эрийдиган рангсиз кристалл. Б витамин гуруҳига мансуб, суюқланиш температураси 236—237°. Организмда кенг тарқалган. Сут, балиқ, сабзавотлар-мевалар, ачитқи, буғдой кепаги, гўшт, айниқса, жигар ва буйракда кўп. Никотин кислотаси амиди — никотинамид (қаранг Витаминлар) коферментлар — никотинами-дадениндинуклеотид (НАД) ва никотинамид-адениндинуклеотидфосфат (НАДФ) таркибига киради. Никотин кислотасининг организмдаги аҳамияти меъда-ичак йўллари эпидермаси ва эпителийсини ҳамда нерв системаси функсиясини нормал ҳолатда тутиб туришдан иборат. Кишининг Никотин кислотасига бўлган бир кеча-кундуздаги эҳтиёжи 20–30 мг. Никотин кислотаси етишмаса, пеллагра келиб чиқади. Никотин кислотаси пеллаградан ташқари, меъда-ичак касалликлари, атеросклероз ва бошқа касалликларни даволашда ҳам ишлатилади. Саноатда никотинни оксидлаб олинади.