Odiljon Ziyodullayev

Зиёсферада исми Одилжон ва фамилияси Зиёдуллаев бўлган бошқа кишилар ҳақида ҳам мақолалар мавжуд.

Одилжон Эгамбердиевич Зиёдуллаев (1979-йил 1-феврал, Бахмал тумани, Жиззах вилояти, Ўзбекистон ССР) — ўзбекистонлик олим, кимё фанлари доктори, профессор.

Одилжон Эгамбердиевич Зиёдуллаев
Таваллуди	1979-йил 1-феврал (1979-02-01) Бахмал тумани, Жиззах вилояти, Ўзбекистон ССР
Фуқаролиги	Ўзбекистон
Касби	кимёгар
Соҳаси	кимё
Таълими	Самарқанд давлат университети (бакалавриат) Ўзбекистон Миллий университети (магистратура)
Илмий даражаси	кимё фанлари доктори
Илмий унвони	профессор
Мукофотлари

Биографияси

Одилжон Зиёдуллаев 1979-йил 1-феврал Бахмал тумани ишчилар оиласида туғилган. 2000-йилда Самарқанд давлат университети кимё факултетини бакалавриатини, 2003-йилда Ўзбекистон Миллий университети „Нефт ва табиий газ кимёси“ мутахассислиги бўйича магистратурани тамомлаган. 2003—2006-йилларда Ўзбекистон Миллий университетида „Органик кимё“ ихтисослиги бўйича аспирантурада таълим олган. 2006—2011 йилларда Ўзбекистон Миллий университети кимё факултетида муҳандис-техник, 2011—2012-йилларда Тошкент кимё-технология институти нефт ва газни қайта ишлаш кимёвий технологияси кафедраси ассистенти, 2012-йилда шу институтнинг Ёқилғи ва органик бирикмалар кимёвий технологияси факултети маънавий-маърифий ишлар бўйича декан ўринбосари, 2012—2017-йилларда Тошкент кимё-технология институти „Нефт ва газни қайта ишлаш кимёвий технологияси“ кафедраси мудири, 2017-йилда Ўзбекистон Миллий университети илмий ва илмий-педагогик кадрлар тайёрлаш бўлими бошлиғи, 2017—2019-йилларда Чирчиқ давлат педагогика институти ўқув ва илмий ишлар бўйича проректори, 2019—2022-йилларда Чирчиқ давлат педагогика институти илмий ишлар ва инновациялар бўйича проректори лавозимида фаолият олиб борган. 2022-йилдан Чирчиқ давлат педагогика университети илмий ишлар ва инновациялар бўйича проректори.

Илмий фаолияти

Одилжон Зиёдуллаев 2011-йилда Органик моддалар технологияси ихтисослиги бўйича кимё фанлари номзоди, 2016-йилда Органик кимё ихтисослиги бўйича кимё фанлари доктори илмий даражасини олган. 2016-йилда доцент илмий унвони берилган. „Нефт-газ кимёси ва физикаси“ (2014), „Нефт-газни қайта ишлаш технологияси“ (2016) номли дарсликлар, „Нефт ва газни қайта ишлаш технологияси“ (2013), „Нефт ва газни қайта ишлаш корхоналари жиҳозлари ва лойиҳалаш асослари“ (2014), „Нефт-газ кимёси ва физикаси“ (2015) номли ўқув қўлланмалари, „Ацетилен спиртлари: олиниши, хоссалари, қўлланиши“ (2017) номли монография муаллифи.

Мукофотлари

• „Ўзбекистон Республикаси Мустақиллигининг 30 йиллиги“ эсдалик нишони (2021).