Oqshoh

Оқшоҳ (? - 1221) - Муҳаммад Хоразмшоҳнинг ўғли. Хоразмшоҳ ўлими олдидан Оқшоҳ ва бошқа ўғли Ўзлоқшоҳни чақириб тахтни Жалолиддин Мангубердига топширишини билдирган. Ака-укалар Гурганжни мудофаа этиш учун келишиб олган. Бироқ собиқ валиаҳд Ўзлоқшоҳнинг тарафдорлари Жалолиддинни тан олмаганлар. Жалолиддин Гурганжни ташлаб кетишга мажбур бўлган. 3 кундан сўнг мўғулларнинг яқинлашиб келаётганини эшитган Ўзлоқшоҳ ва Оқшоҳлар ҳам шаҳарни тарк этганлар. Мўғуллар уларни таъқиб этиб, Ҳабушон вилоятидаги Вашта қишлоғида уларга етиб олганлар. Аввалига шаҳзодалар мўғулларнинг бир тўдасини енгишган, ғалабадан кибрланиб, хавф-хатардан огоҳ бўлмай турганларида мўғуллар уларни қуршаб олиб, аскарлари билан чопиб ташлаган. Мўғуллар Оқшоҳ ва Ўзлоқшоҳнинг каллаларини найзага илиб, мамлакат бўйлаб кўтариб юришган.

Жувайниининг ёзишича, Ўзлоқшоҳ ва Оқшоҳ мўғуллар томонидан асир олиниб, 2 кундан сўнг қатл этилган. Рашидуддинга кўра, мўғуллар уларни шаҳзода эканликларидан бехабар бошқалар қатори чопиб ташлаганлар.