Padana tekisligi

Падана текислиги (ПаданаВенеция текислиги) — Италиянинг шимолий қисмидаги текислик. Алп ва Апеннин тоғлари билан Адриатика денгизи оралиғида. Падана текислиги усти қалин денгиз ва дарё жинслари билан тўлган тектоник букилма. Узунлиги 500 км чамасида, эни 200 км гача. Ер юзаси, асосан, текис, баландлиги ғарбида 300–400 м. Текисликнинг марказий қисмидан По дарёси ва унинг ирмоқлари оқиб ўтади. Иқлими субтропик, айрим жойларида мўтадил иқлим. Январнинг ўртача температураси 0—4°C, июлники 22—24°C. Йиллик ёғин 600–1000 мм. Тошқинлар бўлиб туради. Ўрмонлар қирқилиб ўрни экинзорга айлантирилган. Падана текислиги — Италиянинг асосий саноат ва қишлоқ хўжалиги раёни. Буғдой, маккажўхори, шоли экилади. Токзорлар ва мевали боғлар бор. Падана текислигида Милан, Турин, Венеция, Болоня шаҳарлари жойлашган.