Pavel Shilling

Павел Лвович Шиллинг [1786.5(16).4, Таллин 1837.25.7(6.8), Петербург] — рус олими, физик, шарқшунос. Петербург Фанлар академияси мухбир аъзоси (1828). Россияда биринчи литографияни ташкил этган. 1829-йилда хитой матнларидан нусха кўчиришнинг махсус литография усулини ишлаб чиққан. Осиё халқлари тарихи ва тилларига оид тадқиқотлар билан шуғулланган. 1830—32 йилларда Хитой чегараларига илмий экспедиция уюштирган (Н.Я.Бичурин билан бирга). 1812-йилда ўзи ихтиро қилган электр минани синаб кўрган (Петербург, Нева дарёси). Электромагнит телеграф конструксиясини ишлаб чиққан, уни 1832-йилда биринчи марта намойиш этган. Электр мина ва телеграф учун ер ва сув остида ўтказиладиган электр симлари намуналарини яратган, электр симларини ҳавода тортиш ғоясини илгари сурган. Шарқ қўлёзмаларининг бой коллексиясига эга бўлган.