Rixsiboy Orifjonov

Рихсибой Орифжонов (1926.23.4 – Тошкент – 1979-йил, 6-апрел) — актёр, режиссёр, драматург. Ўзбекистонда хизмат кўрсатган санъат арбоби (1964). Тошкент театр ва рассомлик санъати институтини тугатган (1953). Ҳамза театрида (1941–53; 1956–61), Қўқон театрида (1953–56) актёр. Каттақўрғон театрида (1961–64), Самарқанд театрида (1964–67) бош режиссёр, Сурхондарё театрида бош режиссёр ва директор (1970–72), Тошкентдаги Муқимий театрида директор (1973–75), Сирдарё театрида бош режиссёр (1975–78), Республика халқ ижоди уйи раҳ-бари (1978–79). Омон (Туйғун, "Баҳодир"), Соли писмиқ, Асқар (Уйғун, "Қалтис ҳазил", "Ҳуррият"), Ялангтўш (Н. Сафаров, "Шарқтонги"), Муқимий (С. Абдулла, "Муқимий"), Карл Моор (Ф. Шиллер, "Қароқчилар"), Саттор (Б. Раҳмонов, "Юрак сирлари") каби образларни яратган. Режиссёр сифатида "Она қалби" (М. Бобоев), "Фурқат" (Б. Авезов), "Дугоналар" (Ё. Худойқулов), "Қароқчилар" (Ф. Шиллер), "Ажаб савдолар" (Ҳ. Ғулом), "Нодира" (Ҳ. Раззоқов), "Бой ила хизматчи" (Ҳамза) каби 50 дан ортиқ спектакл саҳналаштирган. Республика театрларида саҳналаш-тирилган "Башаранг қийшиқ бўлса...". "Турмуш сабоқлари", "Она ҳукми", "Алданган қиз" сингари песалар муаллифи.