Roya Tolui
Roya Tooui (1966-yil 22-mayda tugʻilgan) — eronlik taniqli jurnalist, inson huquqlari faoli va feminist. Bugungi kunda AQShda istiqomat qiladi.
Hayoti va faoliyati
Tolui 1966-yil 22-mayda Gʻarbiy Eronning Kurdiston ustoni Baneh shahrida dunyoga kelgan. U Banehdagi oʻrta maktabni tamomlagan. Keyinchalik Mashhad universitetida tibbiy laboratoriya[1] yoʻnalishi boʻyicha PhD darajasini egallagan.
Tolui ayollar masalalariga bagʻishlangan kurd tilidagi oylik nashr etiluvchi „Rasan“ (tarjimasi „Qoʻzgʻolon“) jurnalining bosh muharriri boʻlib faoliyat yuritgan. Jurnalning dastlabki besh soni 2005-yil bahor va yoz oylarida Sanandaj shahrida nashr etilgan, biroq 2005-yil yoz oylarida Eron sud tizimi tomonidan yopib qoʻyilgan. Tolui Kurdistonda tinchlikni qoʻllab-quvvatlovchi kurd ayollari uyushmasi asoschisi hisoblanadi. Bundan tashqari, u Kurd PEN aʼzosi hamdir.
Hokimiyatni ochiq tanqid qilgani, shuningdek, kurd va eronlik ayollarning huquqlarini himoya qilgani sababli Tolui 2005-yil aprel oyida Inqilobiy sudda sud qilinib, milliy xavfsizlikka tahdid solishda ayblangan[2].
Eronning gʻarbiy qismidagi kurdlar yashaydigan hududlarda amalga oshirilgan namoyishlardan soʻng Tolui 2005-yil 2-avgust kuni hibsga olinib, 2005-yil oktyabr oyida garov evaziga ozod etilguniga qadar 66 kun qamoqda saqlangan[3]. Uning qamoqqa olinish ishi 2005-yil noyabr oyida Xalqaro PEN klubining „Qamalgan yozuvchi kuni“ doirasida yoritilgan[4]. Ozodlikka chiqqach, Tolui Erondan Turkiyaga qochib oʻtgan va nihoyat 2006-yil aprel oyida AQShdan boshpana soʻragan. 2006-yilda Tolui Oxfam Novib/PEN mukofoti bilan taqdirlangan[5].
Manbalar
- ↑ „دکتر رؤيا طلوعي“. The Medical Council of The Islamic Republic of Iran search engine. 2013-yil 28-sentyabrda asl nusxadan arxivlangan. Qaraldi: 2013-yil 28-sentyabr.
- ↑ http://www.ifex.org/en/content/view/full/69742/?PHPSESSID= [sayt ishlamaydi]
- ↑ http://www.ifex.org/en/content/view/full/69742/?PHPSESSID= [sayt ishlamaydi]
- ↑ „International PEN“. internationalpen.org.uk. 2007-yil 11-martda asl nusxadan arxivlangan.
- ↑ „Writer Wins Freedom Award“. The Warsaw Voice (2006-yil 29-noyabr). Qaraldi: 2012-yil 10-sentyabr.