Salohiddin Azizboyev

Salohiddin Azizboyev
Kasbi	Xonanda, sozanda, bastakor, pedagog
Faoliyat yillari	1980-yillardan hozirgacha
Mukofotlari	«Madaniyat va san’at fidokori»

Azizboyev Salohiddin Sadullaevich (1964-yil 2-sentyabr, Tojikiston) — o‘zbek xonandasi, sozandasi, bastakori va pedagogi.

Otasi — Tojikiston xalq hofizi Sa’dullo Azizboyev (1932–1996), onasi — Mehrixon Azizboyeva (1945–2017). Oiladagi ijodiy muhit Salohiddin Azizboyevning bolalik davridanoq san’atga bo‘lgan qiziqishini shakllantirgan.

Hayoti va ta’limi

Salohiddin Azizboyev 12 yoshidan musiqa bilan jiddiy shug‘ullana boshlagan. Ilk ustozi — otasi Sa’dullo Azizboyev bo‘lgan. U dastlab 8-sonli umumta’lim maktabidagi musiqa to‘garagida tahsil olgan, keyinchalik Xo‘jand shahridagi Sodirxon Hofiz nomidagi musiqa bilim yurtida ta’lim olgan.

1983-yilda M. Ashrafiy nomidagi Toshkent davlat konservatoriyasini (hozirgi O‘zbekiston davlat konservatoriyasi) tamomlagan. Ta’lim yo‘nalishi — an’anaviy ijrochilik kafedrasi, g‘ijjak cholg‘usi (konsert ijrochisi va o‘qituvchi).

U Abduhoshim Ismoilov, O‘lmas Rasulov, Turg‘un Alimatov, Fattoxon Mamadaliev, Mahmudjon Tojiboyev, Rahmatjon Qurbonov kabi ustozlardan saboq olgan. Shuningdek, san’atshunos Fayzulla Karomatov va Otanazar Matyoqubovlardan ilmiy bilim olgan.

Ijodiy faoliyati

Salohiddin Azizboyevning sahna faoliyati 14 yoshidan boshlangan. 1987-yilda “Asl” guruhi tarkibida, 1989-yilda “Panorama” saroyida ijodiy faoliyat olib borgan. 1993-yilda Pokiston Islom Respublikasida gastrol safarida bo‘lgan.

Uning ijodi milliy mumtoz musiqa va milliy estrada janrlarini qamrab oladi. Ijro uslubi ustoz–shogird an’analari va Sharq musiqasi asosida shakllangan.

Repertuari

San’atkor repertuaridan „Yor ketdiyu“, «Gunohimmi», «Aylama», «Oh gulim», «Kel endi», «Qoshlaringiz» kabi milliy estrada asarlari, shuningdek, maqom va mumtoz musiqaning nodir namunalari o‘rin olgan.

Pedagogik faoliyati

Salohiddin Azizboyev 1988-yildan buyon pedagogik faoliyat bilan shug‘ullanadi. 1988–2020-yillarda O‘zbekiston davlat konservatoriyasida, 2020-yildan hozirga qadar Yunus Rajabiy nomidagi O‘zbek milliy musiqa san’ati institutida dars berib kelmoqda.

U 100 nafardan ortiq shogirdlar tayyorlagan.

Mukofotlar

• O‘zbekiston Respublikasi Mustaqilligining 15 yilligi esdalik nishoni (2006)
• «Madaniyat va san’at fidokori» ko‘krak nishoni (2020)
• O‘zbekiston Respublikasi Mustaqilligining 30 yilligi esdalik nishoni (2022)
• «Ma’naviyat fidoyisi» ko‘krak nishoni (2022)
• «Oliy ta’lim a’lochisi» (2025)

Xorijiy faoliyati

San’atkor Pokiston, Turkiya, Ozarbayjon, Rossiya, Eron va Tojikistonda ijodiy chiqishlar qilgan.

Ilmiy merosi

U 5 ta o‘quv-uslubiy qo‘llanma, 3 ta darslik va 30 dan ortiq ilmiy maqola muallifi. O‘zbekiston Milliy teleradiokompaniyasining oltin fondida uning musiqiy yozuvlari saqlanadi.

Havolalar

https://uz.lyricsus.com/artist/salohiddin-azizboyev/

https://www.oriens.uz/media/journalarticles/52_Salohiddin_Azizboyev_383-387.pdf