Sin Shixuandi

Син Шихуанди

Син Шихуанди, асл исми Ин Чжен (мил. ав. 259—210) — Син салтанати подшоси (мил. ав. 246— 221), Хитой императори (мил. ав. 221—210). Син ҳукмдорлари хонадонига мансуб бўлган. Хитойдаги олти та подшоликни босиб олиб, мил. ав. 221-йил ягона марказлашган Син империясини барпо этган ва ўзини биринчи Хитой императори — Син Шихуанди деб эълон қилган. Унинг даврида, мил. ав. 215/214-йилдан Буюк Хитой деворини илгари мавжуд бўлган чегара истеҳкомлари билан яхлит ҳолга келтириш жараёни бошланган. Син Шихуанди қўлида қонун чиқариш, олий ижроия ва суд ҳокимияти тўпланган. Ўз ҳокимиятига нисбатан ҳар қандай танкидий муносабатларга барҳам бериш мақсадида мил. ав. 213-йил хусусий шахслар қўлида сақланаётган гуманитар адабиётларни ёқиш ҳақида фармон чиқарган. Мил.ав.212-йил С.Ш. император ҳокимиятига қарши халқни кўтармоқчи бўлган 460 та конфуцийлик арбобларини қатл эттирган. С.Ш. даврида зулм кучайган, унинг вафотидан сўнг халқ қўзғолонлари кўтарилиб Син империяси барҳам топган. Император ҳозирги Сиан яқинидаги дафн этилган ери билан шуҳрат қозонган; мақбарани 700 минг асир-қул барпо этган. Син Шихуанди ўлимидан сўнг ҳам ҳарбий кучга таяниш учун 6 минг жангчиси ва отларнинг бўй баравар кат-тликдаги ҳайкалларини ясашни буюрган. Син Шихуанди вафот этганида барча ҳайкаллар ҳам у билан қўшиб кўмилган. 1974-йил С.Ш. дафн этилган жойдан жангчилар ва отларнинг бўй баравар катталикда ишланган терракота ҳайкаллари (тахминан мил. ав. 210-йил) топилган.