Sunbod harakati

Сунбод ҳаракати - Шим.

Шарқий ва Марказий Эронда Аббосийлар халифалигига қарши халқ (асосан, деҳқонлар) ғаракати (755 й.). Ҳаракатни Нишопур атрофидаги Охан қишлоғидан бўлган Сунбод исмли киши бошқарган. Сунбод ҳаракатининг бошланишига асосий сабаб — аббосийларнинг халқдан хирож йиғиш ва мажбурий ишлатиш (қасрлар қуриш, каналлар қазиш ва бошқалар)дан озод қилиш ҳақидаги ваъдасини бажармагани бўлган. Хуросон ва Мовароуннахр ноиби Абу Муслимнинг халифа Мансур буйруғи билан ўлдирилиши Сунбод ҳаракатига баҳона бўлган. Бу ҳаракат сунний аббосийларга қарши қаратилган бўлиб, унда зардуштийлар, шиалар ва хуррамийлар қатнашган. Табарипният ёзишича, ҳаракат 2 ой давом этган. Халифа Мансур бу ҳаракатни бостириш учун 10 минг кишилик қўшин юборган. Бу қўшин Ҳамадон билан Рай ўртасидаги чўлнинг чеккасида Сунбод қўшинини тормор келтирган. Шу жангда Сунбод ҳам ҳалок бўлган. Сунбод ҳаракати билан бир вақтнинг ўзида Мовароуннаҳрда ҳам аббосийларга қарши ҳаракат бошланган. Унчалик катта бўлмаган бу ҳаракатга Абу Муслим тарафдори — Ишок бошчилик қилган.