Tokarlik stanogi

Токарлик станоги - 1) машинасозликда — асосан, доиравий сиртли буюмларга йўниб ишлов берадиган станок; металл кесиш станокларининг асосий гуруҳини ташкил қилади. Токарлик станоги ёрдамида сиртларни йўниш, сиртларда ички ва ташқи резбалар очиш, пармалаш, зенкерлаш (пармаланган тешикларга тозалаб ишлов бериш), тешикларни йўниб кенгайтириш, плашка ҳамда метчиклар билан резба очиш, бир-бирига ишқалаб мослаш мумкин. Асосий ҳаракатни заготовка (хомаки детал), қўшимча ҳаракатни кесувчи асбоб — кескич бажаради. Заготовка поволокли, кулачокли, гидравлик ёки пневматик патрон орқали станок шпинделидан айланади; шпиндел эса тезликлар қутисидан ҳаракатланади. Кескич суппортнинг салазкаси билан биргаликда суриш валидан ёки суриш винтидан (резба очишда) сурилади. Суриш вали ва суриш винти Токарлик станогининг суришлар механизмидан айланади. Токарлик станогининг марказловчи, резба очиш, токарликреволвер (айланма каллакли), бир шпинделли ва кўп шпинделли карусел (шпиндели тик жоилашган), кўп кескичли ва бошқа турлари бор.

Токарлик станоги оддий, универсал, рақамли дастур бўйича бошқариладиган автомат ва ярим автомат турларга ҳам бўлинади. Оддий ва универсал Токарлик станогилар деталларни доналаб ва кичик сериялаб ишлаб чиқариш.да, автомат ва ярим автомат Токарлик станогилар кўплаб (кўп сериялаб) ишлаб чиқариш.да қўлланади. Токарлик станогининг асосий қисмлари: қиринди ва совитувчи суюқлик тўпланадиган тоғорасимон туб; станина, суппорт ва кетинги бабка (қўзғалувчан) ҳамда уларни йўналтиргич; шпиндел ва тезликлар кутиси жоилашган қўзалмас олд бабка; узатмалар қутиси; фартук; суппорт; каретка; кўндаланг салазкалар; кескич ўрнатиладиган бурилма қисм; элекр двигател. Каретка ва кўндаланг салазкалар қўлда ёки автоматик тарзда сурилади. Токарлик станогининг электр двигатели бир ёки кўп тезликли асинхрон двигателдан иборат. Баъзан, бошқа юритмалар (мас., гидравлик юритмалар) ҳам қўлланиши мумкин. Ҳозир йирик корхоналарда, асосан, дустурли автомат ва ярим автомат Токарлик станогилари ишлатилади (қаранг Карусел станок, Револвер станок); 2) ёғочга ишлов бериш станоги қам худди металлга ишлов бериш станогига ўхшайди. Унда айланма сиртли ёгоч буюмларга йўниб ишлов берилади. Унинг буюм марказга маҳкамланадиган ва ён томонига маҳкамланадиган турлари бор.