Vahobjon Fayozov

Ваҳобжон Собирович Фаёзов (1912-йил 10-август, Қўқон — 1974-йил 8-феврал, Урганч) — актёр, режиссёр, хонанда (лирик тенор). Ўзбекистон халқ артисти (1950). Ўз фаолиятини 1932-йил Қўқон темирйўлчилар клуби қошидаги ишчилар театрида бошлаган. 1933—1934-йиллар Қўқон театрида, 1934-йилдан Огаҳий номидаги Хоразм театрида ишлаган. Ғариб (М. Юнусов, С. Самандаров, "Ошиқ Ғариб ва Шоҳсанам"), Тоҳир (С. Абдулла, "Тоҳир ва Зуҳра"), Жалолиддин (М. Шайхзода, "Жалолиддин Мангуберди"), Мажнун, Фархрд (Хуршид, "Лайли ва Мажнун", "Фарҳод ва Ширин"), Ҳусайн Бойқаро (Уйғун, И. Султон, "Алишер Навоий"), Ғофир (Ҳамза, "Бой ила хизматчи"), Тошболта (Ҳ. Ғулом, "Тошболта ошиқ"), Мулладўст (Ҳамза, "Майсаранинг иши"), Аброр (Уйғун, "Парвона"), Нурбобо (И. Султон, "Номаълум киши"), Мирзакаримбой (Ойбек, "Қутлуғ қон") образларини яратган. Фаёзов ижоди хиссиётлар тўлқини, буюк инсоний фазилатларни моҳирона оча олиши билан эътиборли бўлиб, образлари ҳаётийлиги, юксак ижро савияси билан ажралиб туради. Хонанда сифатида "Феруз 1,2", "Хоразм Чоргоҳи", "Дугоҳ", "Ёрим берган оқ рўмол", "Фарибдурмен" каби ашулаларни баланд авжда чиройли ва ёқимли айтган. Режиссёр сифатида "Бой ила хизматчи", "Паранжи сирлари" (Ҳамза), "Шоҳи сўзана" (Абдулла Қаҳҳор), "Макр ва мухаббат" (Ф. Шиллер), "Муқимий" (С. Абдулла) каби спектаклларни саҳналаштирган. Матёқуб Раҳимов, Комилжон Отаниёзов ва бошқа унинг шогирдларидир.