Vezikulopustuloz

Везикулопустулоз — чақалоқлар орасида кенг тарқалган касаллик бўлиб, бунда баданга турли катталикдаги маддалар тошади. Касаллик гўдак ҳаётининг дастлабки кунларидаёқ намоён бўлиши мумкин. Бунда боланинг боши, баданининг сербурма соҳалари ва оёқ-қўлларига четлари қизил яллиғланган ҳошия билан чегараланган пустулалар чиқади; пустулалар битта, иккита ёки бир нечта бўлиши мумкин. Гистологик тадқиқотлар яллиғланишли ўзгаришлар эккрин тер безларининг оғиз қисмида бўлишини кўрсатади. Касаллик фақат тер безининг йўли юзаки яллиғланиши билан кечса пустулалар ҳосил бўлади(периопорит). Пустулалар катталиги буғдойдек бўлиб, ичидан қуюқ йиринг чиқади ва тезда қуриб, пўст ҳосил қилади. Пўст тушиб кетгандан сўнг терида из қоилмайди. Аксарият беморларда тер безларининг йўли ҳамда унинг тутамлари йирингли яллиғланади; дерманинг чуқур қатламида аниқ чегараланган консистенсияси қаттиқ, кўкимтир қизил-рангли тугунчалар пайдо бўлади. Уларнинг катталиги нўхатдек, кейинчалик ёнғоқдек бўлиб кетади. Тугун ўртаси юмшаб зарарланган соҳа териси юпқа тортади, босганда билқиллаб туради, ёрилса қон аралаш йиринг оқиб чиқади. Ярада некротик ўзак бўлмайди. Касаллик пировардида чандиқланиш кузатилади. Аксарият беморларда яллиғланиш тугунча 1-2 та баъзан бир нечта бўлади. Кўпроқ бола баданининг ўрин кўрпасига тегиб ишқаланадиган жойлари, боши, бўйин, бел, думг;аза соҳаси зарарланади. Абссессланиш даврида умумий дармонсизлик, ҳароратнинг кўтарилиши (38-39 °C) ҳосизланиш ва умумий диспептик ҳолатлар кузатилади. Айниқса, илк гўдаклик чоғида касаллик оғир кечади. Даво чоралари ўз вақтида кўрилишига қарамай, нимжон болаларда касаллик ҳар 10-30 кунда қайталаниб туради, отит, зотилжам, менингит, остеомиелит, парапроктит ва сепсис (бактериемия) каби оғир асоратларга олиб келиши мумкин. Болаларга кўплаб тошадиган абссесс ёки сохта фурункулозни фолликулит ёки фурункулоз билан таққосланади. Маълумки фолликулит ёки фурункулоз, асосан, катталарда учрайди ҳамда унинг пустула марказидан соч чиқиб туради ва ёрилганда ичидан некротик ўзак чиқади. Шунингдек, папулонекротик тери силининг бошланғич босқичи билан қиёсланади. Тери силига чалинган беморларда Пирке реаксияси мусбат бўлиб, бошқа аъзоларда сил ўчоқлари аниқланади. Касаллик оқибати боланинг умумий аҳволига боғлиқ бўлиб, айниқса, дистрофияга учраган болаларда оғирроқ кечади. Баъзан зотилжам ёки сепсис қўшилиб бола нобуд бўлиши мумкин. Шунинг учун бемор бола албатта касалхонада даволаниши лозим.