Xitoy-koreya platformasi

Хитой-Корея платформаси, Сина қалқони — қадимги платформа; Хуанхе дарё ҳавзасининг қуйи қисми ва Корея ярим орол, шунингдек, Сариқ денгиз тубининг кўп қисмида жойлашган. Платформа ғарбда Ички Монголия бўйлаб давом этиб, торайиб боради. Шарқий қисми Корея ва Шарқий Хитойни қамраб олган, бурмаланган кристалли замини токембрий (протерозой ва архей) ёшида. Корея, Ляодун я. о.лари ва Шансида кўтарилмалар шаклида ер юзасига чиқиб қолган пойдевор метаморфик жинслар (гнейс, мигматит, кристалли сланец, амфиболитлар) ва гранитлардан тузилган. Аншан сериясида (куйи протерозой) темирли кварситларнинг йирик конлари мавжуд. Платформа пойдевори устида чўкинди қоплам жинслари бўлиб, чўкинди мажмуасининг қуйи қисми сина системаси ётқизиқларидан иборат. Тошкўмир, перм ва юра даврлари ётқизикларида тошкўмир конлари, палеоген ва неоген ётқизиқларида ёнувчи сланецлар ва кумир (Фушун), перм ётқизикларида эса бокситлар (Шандун провинсияси) мавжуд. Бохайван қўлтиғи соҳилидаги Шим.Хитой синеклизасининг бўр ва кайнозой ётқизикларида нефт конлари жойлашган. Ордос синеклизасида ҳам нефт ва газ конлари мавжуд. Корея ярим оролдаги олтин, волфрам, полиметалл конлари ва Ляодун ярим оролдаги сурма ва мис конлари пайдо бўлиши мезозой магматизми билан боғлиқ.