Ziyosfera

Boris Nasledov

Борис Николаевич Наследов (1885-йил 4 (16)-ноябр Қорақалпоғистон Республикаси Тўрткўл тумани — 1942-йил 17-ноябр Тошкент шаҳри) — рус ва совет геологи, Самарқанд давлат университети ва Мирзо Улуғбек номидаги Ўзбекистон Миллий университети профессори. Маҳаллий маъдан конларининг малакали мутахассиси, геология ва тоғ-кон саноати соҳасида геологик-қидирув ишлари ташкилотчиси[1].

Биографияси

Борис Наследов 1885-йил 4(16)-ноябр Петро-Александровск шаҳрида (Сирдарё вилояти, Оренбург губернияси)[2] Оренбург казак қўшинлари офицери Николай Александрович Наследов оиласида дунёга келган.

Маълумоти

  • 1904-йилда Оренбург шаҳридаги гимназияни тамомлаган.
  • 1904-йилда Император Санкт-Петербург университетига ўқишга кирган.
  • 1905-йилда Борис кончилик институтига танлов асосида ўқишга қабул қилинган[3].
  • 1915-йилда геолог-қидирувчи мутахассислигини имтиёзли диплом билан тамомлаган,

Чет тилларидан юнон, лотин, франсуз, немис, инглиз ва эксперанто[4] тилларини ўрганган.

Илмий-педагогик фаолияти

  • 1915-йилдан бошлаб Оренбург казак қўшинлари ҳарбий-хўжалик кенгашида дастлаб ёрдамчи, кейинчалик кончилик бўлими бошлиғи лавозимида ишлаган.
  • 1919-йилдан Омск ва Иркуцкдаги ёқилғи билан ишлаш;
  • 1920-йилдан Иркуцк Геология қўмитасининг Сибпромразведка қидирув бўлимида;
  • 1923-йили Сибирда муҳандис-геолог,
  • 1924-йилда — Москвада;
  • 1925-йилда — Ленинградда;
  • 1929-йилда — Геология қўмитасининг Ўрта Осиё (металл бўлими бошлиғи) бўлимларида фаолият кўрсатган;
  • 1924-1928-йилларда Москва кончилик академиясининг геологик-қидирув факултетида дарс берган. ,,Руда конлари" курси бўйича маъруза ўқиган. Ёрдамчиси В.А.Обручев бўлган.
  • 1932-йилда Ленинободдаги Қорамазор илмий-тадқиқот институти директори ўринбосари;
  • 1934-1939-йилларда Ўзбекистон ССР Фан қўмитаси ва Самарқанд ва Ўрта Осиё (Тошкент) олий ўқув юртлари профессори вазифасида ишлаган.

Борис Наследов 1926-1927-йилларда Ўрта Осиёнинг энг қадимий рудали ҳудудларидан бири -Қорамозордаги Табошар конида геологик-қидирув гуруҳига раҳбарлик қилган. Ушбу фаолият йилларида геолог-олим бир қанча руда турлари, жумладан, „Етакчи“ деб номланган таркибида уран моддаси бўлган йирик конларни аниқланган. 1945-йилда фойдаланишга топширилган мазкур кон СССР уран саноатининг илк топилма бойликларидан ҳисобланган.

Геолог Наследов „Қалмоққир“ конининг мис-молибден моддаларини маҳаллий саноатдаги аҳамиятини ўрганиб чиқиб, тадқиқотлар ўтказган. Тадқиқот натижасига кўра, Олмалиқ шаҳрида жойлашган ва ҳозирги кунда Ўзбекистоннинг йирик кон-металлургия комбинатларидан бири ҳисобланган АГМК („Олмалиқ кон-металлургия комбинати“ АЖ) бунёд этилган.

Борис Наследов 1933-йилда СССР Фанлар академиясининг машҳур тожик-помир экспедицияси аъзолигига қабул қилинган.

Шунингдек олим ўзбек руда геологияси мактаби асосчиларидан ҳисобланади. Қорамозор рудалари кластери бўйича энг йирик мутахассис сифатида ҳудуддаги бир қатор конларни ўрганган, Чотқол ва Курамин тоғларининг геологик тузилиши ва металлогенияси бўйича илмий ишлар олиб борган. Унинг кўпгина металлоген ғоялари ҳозирги кунгача ўз аҳамиятини йўқотмасдан келмоқда.

„Репрессированниэ геологи“ маълумотлар базасида геолог Наследов „1930-йилларда ҳибсга олинган ва бир неча йил қамоқда ўтирган. 1940-йилда озодликка чиққанидан сўнг вафот этган“, деб ёзилади. Аммо 1917-„1939-йилларда СССРда геологлар ва кончиларга қарши террор“ китобида ҳамда „СССР геологларига қарши террор тўғрисидаги нотўғри маълумотлар“ ҳақидаги баёнотнинг 6-иловасида „Геология тарихи бўлимида“ги архив ҳужжатлар буни тасдиқламаганлиги келтириб ўтилган[5].

Борис Наследов 1942-йил 17-ноябрда Тошкентда вафот этган ва у шаҳар марказидаги Боткин қабристонига дафн этилган.

Оиласи

Турмуш ўртоғи Вера Михайловна (илгариги фамилияси Сотниченко)1911-йилда туғилган, Кубан казакларидан.

Халқаро ташкилотлар билан алоқа

1916-йил — Оренбург илмий архив комиссияси;

1917-йил — Рус география жамиятининг Оренбург бўлими;

1926-йил — Ленинградда Инқилобий курашчиларга ёрдам кўрсатиш халқаро ташкилоти (МОПР);

1935-йил — География жамияти геология бошқармаси бюроси аъзоси ҳисобланган.

Чоп этилган ишлари

Асосий нашр этилганлар:

  • Наследов Б. Н. Металлопромышленные ресурсы Средней Азии / Всесоюз. энерг. ком. Оргком. по созыву 1-го Средне-Азиат. энерг.съезда. — Ташкент : Ср.-Аз. Госплан, 1931.
  • Наследов Б. Н., Около-Кулак Е. И. Бахиловские месторождения битуминозных песчаников : С 5 табл.. / Б. Н. Наследов, Е. И. Около-Кулак. — Москва ; Ленинград : Геол. изд-во, 1931
  • Наследов Б. Н. Кара-Мазар и его проблемы / Ст. инж. геолог Н. Б. Наследов; Оргбюро по созыву Кара-Мазарского съезда 1931 г.
  • Наследов Б. Н., Попов В. И. Контуры металлогении и металлорудных возможностей Средней Азии / Б. Н. Наследов, В. И. Попов, при участии: Е. К. Тепикина, В. Э. Пояркова, И. М. Евфименко, К. Д. Соколова, В. М. Бирюкова, Н. П. Петрова [Бригада геологов]; Под ред. Б. Н. Наследова Средне-Азиатск. гос. геол.-разведочный трест «Средазгеоразведка». — Ташкент : тип. изд-ва «Красная звезда», 1932.
  • Наследов Б. Н., Баранов В. И., Соколов П. Т. Опыт методики и разведки месторождений радиоактивных руд в Карамазарском районе Узбекистана / Б. Н. Наследов, В. И. Баранов, П. Т. Соколов. — Ленинград ; Москва : Гос. науч.- техн. геол.-развед. изд-во, 1933
  • Наследов Б. Н., Либман Э. П. Редкие элементы и малые металлы Средней Азии / Б. Н. Наследов, Э. П. Либман. — Ташкент : тип. «Правда Востока», 1933.
  • Наследов Б. Н. Работы в Зеравшанско-пенджикентском направлении. — [Ленинград] : Б. и., 1934.
  • Наследов Б. Н. Месторождения мышьяковых руд в западной части Зеравшанского хребта. — [Ленинград] : Б. и., 1934.
  • Наследов Б. Н. Кара-Мазар. Ред. коллегия: акад. А. Е. Ферсман, Н. П. Горбунов, Д. Щербаков… и др. — Ленинград : Таджик.-Памирск. экспедиция, 1935
  • Наследов Б. Н., Тер-Оганесов Я. Г., Князев П. И. Гидротермальные месторождения оловянных руд в Зеравшанском хребте / Б. Н. Наследов при участии Я. Г. Тер-Оганесова, П. И. Князева. — Ленинград : Химтеорет, 1935.
  • Наследов Б. Н. Металлогения Западного Тянь-Шаня и Узбекистана / Под ред. д-ра геол.-минералогич. наук Ф. И. Вольфсона; М-во геологии и охраны недр СССР. — Москва : Госгеолтехиздат, 1961.

Хотира

Олимнинг шарафига

  • Наследовит — „Олтинтопкан“ конидаги минерал модда[6][7][8];
  • Наследов туғилган жойи
  • Б.Н.Наследов архиви — Ўзбекистон Марказий давлат архиви Б.Н.Наследов номи билан аталган[9].
  • Олмалиқ (Ўзбекистон) шаҳрининг Наследов кўчасида олимнинг геологик кашфиётлари шарафига ҳайкал ўрнатилган.

Манбалар

  1. ↑ Исламов О. И., Литвинский Б. А. Предисловие: (о жизни и деятельности Б. Н. Наследова) // Природа. 1950. № 30. С. 73.
  2. ↑ Заблоцкий Е. М. Б. Н. Наследов // Горное ведомство дореволюционной России: Очерк истории: Биографический словарь. — М.: Новый хронограф, 2014.
  3. ↑ Наследов Б. Н. Краткое жизнеописание. 1941. 8 с.
  4. ↑ Наследов Б. Н. Анкета для сотрудников Московского отделения Геологического Комитета. 1924. 2 с.
  5. ↑ Хомизури Г. П. Террор против геологов и горняков в СССР (Wайбаcк Мачине сайтида 2021-03-03 санасида архивланган) (1917—1988 гг.). 2019. C. 1113.
  6. ↑ Минерал «Наследовит» // Правда Востока. 18 октября 1958.
  7. ↑ Еникеев М. Р. Наследовит — новый минерал с Алтын-Топканского рудного поля // Доклады АН УзССР. 1958. № 5. С. 13-17.
  8. ↑ Наследовите на миндат.орг
  9. ↑ Центральный государственный архив Узбекистана. Фонд Р-2289, 200 ед. хр., 1914—1948.

Ҳаволалар

"https://new.ziyosfera.uz/ziyo/Boris_Nasledov" dan olindi